Rigels Kaso, 42-vjeçari nga qyteti i Bilishtit, nuk ka mundur t’i mbijetojë dhunës së ushtruar ndaj tij pak ditë më parë në kryeqytet.
Rreth orës 17:30, ai gjeti vdekjen në spitalin e Traumës. Burime pranë këtij spitali kanë bërë të ditur se 42 vjeçari ka qenë në koma të pakthyeshme gjatë gjithë këtyre ditëve. Gjendja e tij që në momentin e parë të paraqitur në spital ka qenë shumë e rëndë.
Bajram Gjeleshi 34-vjeç dyshohet të jetë autori i dhunimit të Rigels Kasos. Kaso kishte tre ditë që kishte ardhur në kryeqytet, ku nisi që të flasë me mesazhe me bashkëjetuesen e autorit. Por gjatë kësaj kohe Gjeleshi kishte zbuluar sms e shkëmbyera mes tyre dhe duke folur në emër të së dashurës së tij ka lënë një takim me 42-vjeçarin në afërsi të shtëpisë në rrugën ‘Sokrat Miho’.
Kaso ka shkuar në vendin ku ishte lënë takimi me idenë se do të takonte bashkëjetuesen e Gjeleshit, por aty ka takuar këtë të fundit. 34-vjeçari e ka dhunuar Kason me sende të forta duke e lënë të shtrirë në tokë.
