Pas ngjarjes së dhunimit të 3-vjeçares nga edukatorja në kopshtin privat “Stinët”, Majlinda Dehima është shoqëruar në polici. Pak më herët, Ministria e Arsimit dhe Sportit ka kërkuar zbardhjen e kësaj ngjarje. Ngjarja ka ndodhur pak dit më parë, por me dije është bërë dje. Raportohet se e mitura ka thyer këmbën. Nga pamjet filmike bëhet me dije se edukatorja e ka goditur vajzën me vizore në këmbë dhe në trup. Ngjarja ka ndodhur me 1 nëntor 2023, e vogla është me këmbë të thyer.
Në lidhje me këtë rast, ka reaguar dhe Avokati i Popullit ku njofton se është ngritur një grup hetimor për hetimin e kësaj ngjarje.
Njoftimi i Avokatit të popullit:
Avokati i Popullit ndërmori me iniciativë trajtimin e rastit të publikuar në emisionin investigativ “STOP”, në televizionin kombëtar “Klan” të ushtrimit të dhunës ndaj të miturës 3 vjeçare në kopshtin privat “Stinët”.
Për këtë qëllim, me urdhër të znj. Erinda Ballanca, Avokate e Popullit është ngritur grup hetimor multidisiplinar, i përbërë nga punonjës socialë dhe juristë, i cili do të kryejë hetimin administrativ për rastin në fjalë.
Ditën e sotme grupi hetimor multidisiplinar do të inspektojë dhe monitorojë të gjitha veprimet dhe mosveprimet e ndërmarra nga institucionet përgjegjëse shtetërore.
Avokati i Popullit informon se brenda mandatit kushtetues të tij nuk mund të adresojë rekomandime në subjektet jopublike/private, por do të hetojë mosveprimet e strukturave shtetërore. Në këtë kontekst, Avokati i Popullit thekson se duhet të rishihet mandati i institucionit në funksion të zgjerimit të kompetencave, duke përfshirë edhe sektorin privat.
Në përfundim të hetimit administrtativ, institucioni i Avokati të Popullit do të hartojë raportin përfundimtar me rekomandimet përkatëse, për të bërë të mundur kryerjen e misionit kushtetues, mbrojtjen e të drejtave, lirive dhe interesave të ligjshme të fëmijëve nga veprimet ose mosveprimet e paligjshme apo të parregullta të organeve të administratës publike, si dhe të të tretëve që veprojnë për llogari të saj në interesin më të lartë të fëmijës.
Avokati i Popullit shpreh vlerësimin e tij për investigimin e kujdesshëm të bërë nga Emisioni “Stop” për zbardhjen e këtij rasti, duke ndihmuar në rritjen e ndërgjegjësimit publik dhe përgjegjshmërisë së autoriteteve përkatëse që të marrin masa për çështjen konkrete si dhe për parandalimin e rasteve të tilla të rënda.
