Arben Malaj
“Mirmëngjesi, qeveria duhet të bëjë transparencë publike të menjëhershme, çfarë po ndodh dhe çfarë do të ndodhë me shkollën e mesme tregtare Vlorë. Nqs lajmi për tjetërsimin e destinacionit të kësaj shkolle, e cila pas Monumentit të Pavarësisë është simbolika më e madhe e Vlorës edhe si djep i dijes.
Me shkollën tregtare të Vlorës lidhet mirë-arsimimi i shumë personaliteteve patriotike, por edhe i shumë personaliteteve të ekonomisë dhe financave. Vetëm pushtuesit dhe barbarët shkatërrojnë shkollat, teatrot, kinematë për të ndërtuar pallate.
Në Vlorë ka shumë investime infrastrukturore ku dominon betoni, por Vlora është qyteti pa bibliotekë publike, vazhdon akoma me një ndërtesë që ja kaluam me vendim qeverie në 1998 në kushte emergjence se biblioteka e vjetër me të drejtë ju kthye pronarit.
Vlora akoma nuk ka një investim siç po bëhet me piramidën në Tiranë që Vlora të jetë një qendër/hub për studentët e talentuar shqiptarë por edhe nga bota të fokusuar në ekonominë e dijes.
Vlora duhet të ishte një nga qendrat europiane për kërkimet për ekonomi blu – të cilat financohen nga projekte të BE-së. Vlora akoma nuk ka një ri-ngritje të shkollës së marinës si një prej shkollave më të mira.
Kinematë kanë vite që u tjetërsuan. Mungesa e biblotekave nëpër shkollat dhe njësitë administrative në qytet dhe zonat rurale janë provë e dhimbshme dështimi.
Lidhur me pseudo-argumentin se Shkolla Tregtare është larg qytetit – kjo është sa qesharake aq edhe dëshpëruese për shpërfytyrimin kriminal që të bën babëzia.
Dje studentët e Univetsitetit të Durrësit ishin braktisur nga shërbimi I transport urban deri tek universiteti i tyre.
Kjo është një pengesë për rritjen e barazisë së mundësive për mirë-arsimim të fëmijëve nga familje me të ardhura të pakta apo të varfëra ku sipas Bankës Botërore përfshihen rreth 44% e familjeve shqiptare.
Këtë fundjavë mora pjesë në një aktivitet në Mostar të Bosnie Hercegovinës, ajo që më mbeti në mendje ishte garantimi i shërbimit urban në çdo qendër fshati sado larg nga qytetet si në pjesën e Malit të Zi edhe të BH.
Fokusimi tek investimet fizike i bashkëshoqëruar me shkatërrimin jo vetëm fizik të institucioneve arsimore, shkencore dhe kulturore – vërteton shqetësimin se sa e dëmshme është babëzia, arroganca, pushteti absolut personal, korrupsioni dhe kapja e shtetit.
Mirëarsimimi i një kombi është pasuria më e madhe.
Reagimi jo vetëm i vlonjatëve duhet të jetë maksimal, paqësor dhe patriotik kundër tjetërsimit të kësaj shkolle por edhe të çdo institucioni arsimor, shkencor dhe kulturor.
Kjo shkollë duhet të binjakëzohet me një shkollë europiane dhe duhet të mbetet një perlë e bukur në kurorën e bukurisë dhe krenarisë të Vlorës dhe Shqipërisë.
Arbeni
