Gjykata nuk ka pranuar gjykimin e shkurtuar për të pandehurit, ish-drejtorë dhe ish-zyrtarë të bashkisë së Tiranës.
SPAK ka kërkuar kohë për të përgatitur listën e dëshmitarëve dhe parashtrimin e provave për çështjen penale.
Më 14 shkurt, Gjykata e Posaçme kaloi për gjykim dosjen “5D”.
Të pandehurit, ish-drejtorë në poste të ndryshme të Bashkisë Tiranë, Mariglen Qato, Redi Molla, Taulant Tushe, nën akuzat e korrupsionit, pastrimit e fshehjes së parave e shkeljes së barazisë në tendera, do të gjykohen nga togat e zeza të Gjykatës së Posaçme.
Prokuroria e Posaçme që i hetoi e urdhëroi arrestimin e tyre mbrëmjen e 28 marsit 2024, thotë se ata kanë përdorur lidhjet miqësore për të fshehur pronësinë reale mbi kompaninë 5D.
Kjo do të thotë se duke e zotëruar në mënyrë të tërthortë shoqërinë, Redi Molla si drejtori i UKT dhe Mariglen Qato si Drejtor i Departamentit Mbështetës, sipas SPAK krijuan kushtet që në tendera publikë të favorizohej pikërisht shoqëria që për pronarë kishte vetë ata.
Duke përdorur ortakë fiktivë, ose persona të tretë, “5D Construction” fitoi 7 tendera publikë në mënyrë të jashtëligjshme duke përjashtuar nga gara konkurrentë të tjerë e duke përfituar rreth 192.7 milionë lekë në një hark kohor nga 2016-2020.
Por i implikuar në dhënien e tenderave të Bashkisë Tiranë, sipas Prokurorisë Speciale ka qenë edhe ish- drejtori i Punëve Publike, Taulant Tusha, i arrestuar më herët për dosjen e inceneratorit të Tiranës.
Shoqëria 5D Construction është themeluar në vitin 2016 me administrator të vetëm, Nestor Muhametllarin dhe kishte për veprimtari ndërtimin e linjave elektrike, të rrjetit të ujësjellësit, kanalizimet e ujrave te zeza etj. Kapital fillestar i saj ishte në vlerën 100 lekë, ndërsa katër vjet më pas shkoi në 1 milionë lekë, e në 2022-shin kapitali u rrit në 30 milionë lekë. Por jo vetëm kaq, në fund të vitit 2023 kapitali i 5D u dyfishua, duke shkuar në 60 milionë lekë.
SPAK ka vënë në bankën e të akuzuarve edhe 5 zyrtarë të tjerë. Për të kryer krimin që prokuroria pretendon në bashkëpunim kanë qenë tre anëtarë të Komisionit të Vlerësimit të Ofertave, Enton Punavia, Julian Zanaj dhe Albano Janku si dhe dy gra, Eglantina Zere e Debora Keçi si autoritete kontraktore.
