Gent Ibrahimi është emëruar anëtar i Gjykatës Kushtetuese, pas përfundimit të mandatit të gjyqtarit Përparim Kalo.
Presidenti i Republikës, Bajram Begaj ka emëruar Ibrahimin gjyqtar të Kushtetueses, pas administrimit të listës përfundimtare të Këshillit të Emërimeve në Drejtësi, që e ka renditur ish-kryetarin Këshillit të Lartë të Prokurorisë në vend të parë.
Gara ka qenë e ngushtë mes kandidatëve, ku në vend të dytë është renditur Arta Vorpsi me vetëm 0.16 pikë diferencë. Në vend të tretë, KED ka renditur ish-kryeprokuroren Arta Marku me 82.66 pikë.
NJOFTIMI I PRESIDENCËS:
Presidenti i Republikës, Sh.T.Z Bajram Begaj ka administruar nga Këshilli i Emërimeve në Drejtësi, Listën Përfundimtare të Renditjes së Kandidatëve të lejuar për kandidim dhe Raportin e Arsyetuar të Renditjes së tyre, për plotësimin e vendit vakant në Gjykatën Kushtetuese, vakancë e plotë, e krijuar në Gjykatën Kushtetuese të Republikës së Shqipërisë, me mbarimin e mandatit të gjyqtarit Përparim Kalo, shpallur nga Presidenti i Republikës me Dekretin nr. 13413 datë 13.01.2022.
Sipas praktikës dokumentare të dërguar, Këshilli i Emërimeve në Drejtësi, me vendimin nr. 46 datë 28.10.2022 ka vendosur miratimin e Listës Përfundimtare të Renditjes së Kandidatëve për gjyqtar në Gjykatën Kushtetuese, në vendin vakant, vakancë e plotë e shpallur nga Presidenti i Republikës në datën 13.01.2022, si më poshtë:
1.Z. Genti Ibrahimi 88.38 pikë
2.Znj. Arta Vorpsi 88.22 pikë
3.Znj. Arta Marku 82.66 pikë
Presidenti i Republikës, pasi u njoh dhe vlerësoi praktikën dokumentare të vendimmarrjes së Këshillit të Emërimeve në Drejtësi, si dhe duke vlerësuar nevojën për plotësimin dhe funksionimin e Gjykatës Kushtetuese, në mbështetje të neneve 93, 125 pika 1, 127 pika 3, 129, 149/d pika 1, të Kushtetutës të Republikës së Shqipërisë, neneve 7, 7/a pika 4, 7/b, të ligjit nr.8577, datë 10.02.2000, “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, me Dekretin nr. 13877, datë 7.12.2022, ka vendosur që:
Z. Genti Ibrahimi të emërohet gjyqtar në Gjykatën Kushtetuese.
