Një grup studiuesish brazilianë identifikuan një substancë të pranishme në helmin e gjarprit të specieve yararacusú që është e aftë të parandalojë riprodhimin e koronavirusit në trup.
Molekula e peptidit, e identifikuar nga studiuesit nga Universiteti Shtetëror Paulista (Unesp) frenoi në 75% aftësinë e virusit SARS-CoV-2 për t’u shumuar në një kulturë qelizash majmunësh në laborator, raportoi qenda akademike.
Sipas mediave të huaja, rezultatet paraprake të hulumtimit u botuan më 12 gusht në edicionin online të revistës shkencore ndërkombëtare Molecules dhe na lejojnë të mendojmë për mundësinë e zhvillimit të ilaçeve për të trajtuar Covid-19, sipas Eduardo Maffud, profesor në Institutin e Kimisë Unesp dhe koordinator i studimit.
Specialisti shpjegoi se studiuesit e Unesp-it kishin identifikuar tashmë molekulat e helmit të yararacusú me veti antibakteriale dhe kjo është arsyeja pse ata vendosën të testojnë disa nga ato peptide për të parë nëse ata kishin një veprim në SARS-CoV-2.
“Për fat të mirë kemi marrë një rezultat interesant me një nga substancat. Ne identifikuam një që nuk është toksik për qelizat dhe që pengon riprodhimin e virusit, “- tha ai.
Yararacusú (Bothrops jararacussu) është një specie e gjarprit helmues të gjinisë Bothrops që ka habitatin e saj në rajonet e xhunglës në perëndim, juglindje dhe jug të Brazilit, si dhe në Bolivi, Paraguaj dhe në veri të Argjentinës.
Brazili, një nga vendet më të prekura nga pandemia e koronavirusit në botë, është i dyti në numrin e vdekjeve, me pak më shumë se 575,000 viktima, dhe i treti në numrin e infektimeve, me 20.6 milionë raste.
