Pas Buxhetimit me Pjesëmarrje, ku janë vetë qytetarët ata që paraqesin, problemet dhe prioritetet e tyre, Bashkia tashmë ka shtrirë këtë model edhe në fushën e sportit.
Kryetari i Bashkisë së Elbasanit Z. Gledian Llatja, ka zhvilluar një takim me sportistë, trajnerë dhe stafin e sportit, me qëllim për të përcaktuar prioritet dhe investimet e realizuara gjatë këtij viti në fushën e sportit.
Takimi, është kryer në ambjentet e pallatit të sportit “ Tomorr Sinani” ku drejtori i Sporteve Artin Kovaci ka bërë edhe një përmledhje të investimeve të kryera gjatë këtij viti, ku një ndër më kryesoret është përmirësimi i ambienteve sportive që ndikojnë në rezultatet sportive.
“ Kam kënaqësinë të jem këtu para sportistëve të njohur të Elbasanit për të diskutuar rreth buxhetit që është shumë i rëndësishëm për sportin dhe më bëhet qejfi pasi është hera e pare që dëgjohet edhe zëri i sportistit, i trajnerit i intelektualit dhe të gjithë pjesës tjetër të sportit. Kam kënaqësi që të diskutojmë të gjithë bashkë për të patur një sport sa më cilësor. Jemi këtu, për të diskutuar dhe të mund të nxjerrim problematikat dhe prioritetet dhe të kemi një konkluzion shumë domethënës për të ardhmen e sportit”.
Nga ana e tij Z. Gledian Llatja vlerësoi sportistët elbasanas për rezultatet e tyre të larta ndërsa shtoi se “Elbasani është një qytet që e do sportin, i do rezultatet dhe arritjet që i kemi bërë ne të gjithë bashkë dhe detyrimisht kur e do i gjithë qyteti absolutisht ne e kemi për detyrë të bëjmë punë të mira.
Është hera e parë që ne po bëjmë në aktivitet kaq masiv të dëgjesës publike të buxhetimit me pjesëmarrje përsa i përket fokusit të sportit dhe rëndësisë që ne duhet ti japim buxhetit 2022 çështjes së sporteve, madje ne e kemi pasur këtë fokus të veçantë edhe falë mbështetjes së anëtarëve të Këshillit Bashkiak edhe komisioneve të sporteve. Kemi pasur një vëmendje të veçantë gjatë kësaj periudhe si për investimet por edhe për trajtimet e çështjeve të ndryshme që kanë lidhje me sportet”, tha Llatja.
Duke ngritur vlerat e sportistëve, Llatja shtoi se “ kemi arritur rezultate shumë të mira, kemi skuadra shumë të mira, tashmë kemi krijuar edhe ekipin e futbollit, sportin e radioamatorizmit ku morëm rezultate shumë të mira po ashtu në Kampionatin Botëror.
Ndër të tjera, duke i dhënë rëndësi më shumë të rinjve, Llatja shtoi se “ duhet të shkëpusim të rinjtë nga veset dhe ti afrojmë në sporte. Duhet të përpiqemi që të japim mbështetjen maksimale, si nga ana financiare ashtu edhe infrastrukturore. Rehabilitim i terreneve sportive edhe në Njësitë Administrative si në Gjinar, Kuqan, Gjinar, Bradashesh.
Sporti ka ardhur në rritje dhe gjithashtu do të ketë një rritje edhe për këtë buxhet dhe do përpiqemi që të krijojmë balancë në të gjitha fushat, si sporti, arti etj.
Jam i bindur se bashkarisht do ecim përpara për të mirën e qytetit, për ta ngritur emrin tonë aty e kemi dhe aty ku na takon në të gjitha sportet. Mbështetjen time dhe të bashkisë së Elbasanit e keni dhe e keni patur gjithmonë si dhe do e keni gjithmonë. Kuptohet që mundësitë janë të kufizuara dhe problematikat dhe nevojat janë të mëdhaja. Po mbajtja e një balance është ajo që ne po përpiqemi të kemi si në qytet ashtu edhe nëpër fshatra në të gjitha fushat, si në infrastrukturë, në fushat sociale dhe ajo sportive, si në terrene sportive, pjesës kulturore e artistike”, tha Llatja.
Më pas vetë sportistët, trajnerët, kanë parashtruar prioritetet e tyre të cilat konsistojnë në investime si në terrene sportive, palestra shkolle etj.
Sipas përfaqësuesve të lartë të sportit, kërkohet infrastruktura dhe trajtimi moral dhe material i sportistëve që të arrijnë rezultate edhe më të mira. Infrastruktura sportive ka ndryshuar, janë rregulluar shumë gjëra dhe më mirë do bëhet, pasi Elbasani ka kualitete.
