Kryetari i bashkisë së Kievit, Vitali Klitschko, ka paralajmëruar banorët se duhet të përgatiten për më të keqen këtë dimër nëse Rusia vazhdon të godasë infrastrukturën energjetike të vendit.
Dhe kjo do të thotë ndoshta të mos ketë energji elektrike, ujë ose ngrohje në muajt e ftohtë të dimrit, shkruajnë mediat e huaja.
“Ne po bëjmë gjithçka për ta shmangur këtë. Por le të jemi të sinqertë, armiqtë tanë po bëjnë gjithçka që qyteti të jetë pa ngrohje, pa energji elektrike, pa ujë, në përgjithësi, kështu që të gjithë të vdesim. Dhe e ardhmja e vendit dhe e ardhmja e secilit prej nesh varet nga sa të përgatitur jemi për situata të ndryshme”, citohet të ketë thënë Klitschko për mediat shtetërore ukrainase.
Ndërkohë presidenti Volodymyr Zelensky tha të dielën vonë se rreth 4.5 milionë njerëz ishin pa energji elektrike.
Ai u bëri thirrje ukrainasve që të durojnë vështirësitë, duke thënë se “ne duhet ta kalojmë këtë dimër dhe të jemi edhe më të fortë në pranverë se tani”.
Rusia është fokusuar në goditjen e infrastrukturës energjetike të Ukrainës gjatë muajit të fundit, duke shkaktuar mungesa të energjisë dhe ndërprerje të qarkullimit në të gjithë vendin.
Kievi kishte ndërprerje të radhës për orë të dielën në pjesë të qytetit dhe rajonit përreth.
Ndërprerje të vazhdueshme ishin planifikuar gjithashtu në rajonet Chernihiv, Cherkasy, Zhytomyr, Sumy, Kharkiv dhe Poltava, tha operatori shtetëror i energjisë i Ukrainës, Ukrenergo.
Kievi planifikon të vendosë rreth 1000 “pika ngrohjeje”, por është e paqartë nëse kjo do të mjaftonte për një qytet me tre milionë banorë.
