Tabloidi i njohur rus Moskovskij Komsomolets nuk i fsheh emocionet: “Kievi është harruar.” shkruan ai.
Tabloidi i njohur rus Moskovskij Komsomolets nuk i fsheh emocionet: “Kievi është harruar.” shkruan ai.
Nën këtë titull ironik, artikulli përmbledh një seri ngjarjesh që sugjerojnë një riorientim të vëmendjes ndërkombëtare – dhe veçanërisht të Shteteve të Bashkuara – nga Ukraina drejt Lindjes së Mesme. Telefonata e ditëlindjes nga Vladimir Putini për Donald Trump, përshëndetjet “në emër të popullit amerikan” nga Sekretari i Shtetit Marco Rubio për Ditën e Rusisë – një gjest që nuk ishte parë që prej vitit 2021 – dhe transferimi i sistemeve anti-dron nga Ukraina drejt Lindjes së Mesme, përmblidhen si sinjale që “më në fund na është lënë në dorë të merremi me Kievin. Dhe me Evropën.”, raporton Corriere.it.
Nga Lindja e Mesme – në dobi të vetes
Ende nuk ka një strategji të qartë të Kremlinit për përfitimet që mund të rrjedhin nga përshkallëzimi i konfliktit mes Izraelit dhe Iranit. Por, një gjë është e sigurt: Operacioni Special Ushtarak në Ukrainë ka rënë nga prioritetet ndërkombëtare, veçanërisht nga ato amerikane. Tashmë, e gjithë dinamika interpretohet në funksion të marrëdhënieve të reja me SHBA-në.
Sipas analistit politik Malek Dudakov, përshkallëzimi i luftës midis Izraelit dhe Iranit mund të shërbejë si katalizator për përmirësimin e marrëdhënieve mes Rusisë dhe Shteteve të Bashkuara. “Ata kanë nevojë për ne,” thotë Dudakov. “SHBA-të mbështesin ushtarakisht Izraelin, por janë të përçarë brenda – si në opinionin publik, ashtu edhe në Partinë Republikane. Ka zëra që i kërkojnë udhëheqësve të mos përfshihen. Në këtë kontekst, ndërmjetësimi i Putinit nuk është thjesht i dobishëm – është i domosdoshëm për të shmangur një përshkallëzim që do ta detyronte Trumpin të veprojë.”
Ndërhyrja e mundshme në Lindjen e Mesme nuk shihet si përpjekje për të rikthyer prestigjin ndërkombëtar të Rusisë – përkundrazi, media shtetërore ruse ka theksuar vazhdimisht qasjen anti-perëndimore të Putinit. E vetmja mënyrë se si interpretohet ky konflikt i ri është përmes formulës: “do ut des” – të jap që të më japësh.
Nuk ka rëndësi që Irani është një aleat historik me të cilin Moska ka rinovuar një pakt ushtarak vetëm gjashtë muaj më parë. “Kur flasim për politikë globale, diplomacia jonë ka vetëm një qëllim: të veprojë në interesin ekskluziv të Rusisë,” shkruan analisti Mikhail Rostovskij, zë i njohur i linjës së ashpër. “Mos mendoni për Iranin, as për Izraelin, as për Evropën e as për Amerikën. Mendoni vetëm për Rusinë. Kjo është një luftë që nuk na përket. Dhe duhet të përqendrohemi vetëm te vetja.”
Duar të lira në Ukrainë
Kjo qasje e rikthen vëmendjen te objektivi kryesor i Rusisë: Ukraina. Nëse bota është e përqendruar te Lindja e Mesme, atëherë Rusia ka më shumë hapësirë për të vepruar lirshëm në Ukrainë.
“Pas luftës mes Iranit dhe Izraelit, Volodymyr Zelensky mund të përballet i vetëm me vështrimin e akullt të Putinit dhe zemërimin e një populli të lodhur nga lufta,” shkruan Sergey Markov, ish-këshilltar i politikës së jashtme në Kremlin. Megjithatë, ai thekson se Putin do të përpiqet të ndërmjetësojë paqen në Lindjen e Mesme, “për arsye morale dhe njerëzore.”
Ekonomisti Mikhail Khazin mendon se konflikti do të dobësojë mbështetjen perëndimore për Ukrainën, ndoshta deri në ndërprerjen e saj. “Nëse SHBA duhet të zgjedhin mes ndihmës për Ukrainën apo për Izraelin, pa dyshim që do të mbështesin këtë të fundit,” thotë ai.
Shkëmbimi i madh
Edhe brenda qarqeve ultranacionaliste ruse, diskursi fokusohet gjithnjë e më shumë te Trump dhe një “shkëmbim strategjik” midis dy krizave. Sipas Tsargrad, një media afër Kremlinit, “Presidenti amerikan kërkon t’i japë fund sa më shpejt luftës në Ukrainë, pasi SHBA-të nuk janë më në gjendje të menaxhojnë dy konflikte të mëdha njëkohësisht. Duke përfshirë Putinin në zgjidhjen e krizës në Lindjen e Mesme, SHBA-të do të lejojnë Rusinë të përfundojë Operacionin Special sipas kushteve të saj.”
Sipas disa zërave, madje, Kremlini mund të ketë ofruar tashmë azil politik për Ajatollah Khamenein dhe bashkëpunëtorët e tij më të afërt – megjithëse, për momentin, nuk ka asnjë konfirmim zyrtar.
Kur bëhet fjalë për komentet e Kremlinit, vërehet një heshtje domethënëse. E vetmja deklaratë “zyrtare” vjen nga agjencia shtetërore RIA Novosti, e cila, në një koment të nënkuptuar, përqesh rëndësinë e Bashkimit Evropian: “Të gjitha përpjekjet për të kufizuar ndikimin tonë diplomatik kanë dështuar. Ajo që thotë BE-ja tashmë nuk ka asnjë rëndësi në tryezën ndërkombëtare të shahut.”
