Gara brenda llojit rezultoi të ishte më e forta në Partinë Socialiste dhe Partinë Demokratike, gjatë procesit të numërimit të zarfeve me votat e Diasporës, në kuadër të zgjedhjeve të 11 majit.
Votat nga jashtë shërbyen për dy përmbysje të bujshme. Një në kampin blu, ku Isuf Çelaj ia rrëmbeu mandatin Shkëlqim Shehut në qarkun e Kukësit. E tjetra në kampin rozë, ku Olta Xhaçka me 140 vota ia mori nga duart mandatin koleges së saj Blerina Gjylameti.
Gara e dy zonjave socialiste në qarkun e Tiranës ishte e ethshme, por në fund ish-ministrja Xhaçka mori 6213 vota, ndërsa Gjylameti 6085 vota.
Pasi nuk ia doli të bëhej pjesë e Kuvendit të ri, Gjylameti ka reaguar përmes një postimi në rrjetet sociale, ku shprehet se nuk bën luftëra të vogla, por “beteja të mëdha për jetët e njerëzve, jo për vete”.
“Në këtë garë nuk ka humbës — ka vetëm të fituar. Dhe unë e besoj këtë me gjithë zemër. Të gjithë kemi fituar vazhdimësinë në rrugën drejt së ardhmes europiane. Beteja jonë vazhdon. Për angazhimet që kjo forcë politike ka marrë”, shkruan më tej Gjylameti.
Kujtojmë se pasi humbi mandatin, Gjylameti i bëri të hënën një kërkesë KQZ-së ku kërkoi pamjet filmike të numërimit të votave në të gjithë qarkun e Tiranës. Kjo kërkesë e saj por edhe të tjerë kolegëve socialist solli edhe reagimin e kryeministrit Edi Rama, i cili ka kërkuar në formë këshillë që të mos ndiqet kjo rrugë.
REAGIMI I BLERINA GJYLAMETIT:
Kam një përqafim të madh për secilin prej jush — dhe s’jeni pak, 6148 zemra! Të gjithë ju që më besuat gjënë më të çmuar që një qytetar ka: votën.
Kudo që ishit — në Njësinë 4, në të gjithë qarkun e Tiranës, dhe mbi të gjitha ju që votuat nga diaspora — dua t’ju them faleminderit.
Çdo votë, çdo shprehje besimi, është një gur i çmuar në themelin e një Shqipërie më të mirë.
Në këtë garë nuk ka humbës — ka vetëm të fituar. Dhe unë e besoj këtë me gjithë zemër.
Të gjithë kemi fituar vazhdimësinë në rrugën drejt së ardhmes europiane.
Unë personalisht kam fituar zemrat tuaja, respektin tuaj, mbështetjen tuaj, dhe për këtë ju jam thellësisht mirënjohëse.
11 maji për mua ishte një fitore e një lloji tjetër: një përvojë e vlefshme, një garë sfiduese dhe një rezultat që më mbush me krenari.
Faleminderit secilit prej jush.
Faleminderit ekipit tim të palodhur, familjes sime të duruar, dhe në veçanti Kryeministrit Edi Rama, për besimin dhe përkrahjen.
Sidomos në këto ditë të lodhshme e sfiduese, të mbushura me emocione, ne – më mirë se kushdo tjetër – e kuptojmë sa e vështirë është të mbash bashkë një familje të madhe si Partia Socialiste.
Beteja jonë vazhdon. Për angazhimet që kjo forcë politike ka marrë.
Ne nuk bëjmë luftëra të vogla — ne bëjmë beteja të mëdha për jetët e njerëzve, aspak për vetët tona.
Mirënjohëse.
Këto zgjedhje, kjo garë, më kanë dhënë vetëdijen e plotë pse jam në politikë, pse në PS, dhe bindjen e thellë se Partia Socialiste është forca që i duhet vendit në këtë moment historik.
Zgjedhjet mbaruan.
Sovrani foli.
Politika për njerëzit vazhdon.
