Kryeministri grek Kyriakos Mitsotakis është shprehur këtë të premte se Bashkimi Evropian duhet të integrojë të gjashtë vendet e Ballkanit Perëndimor, në BE, deri në vitin 2033, në atë që ai e quajti një “hap të guximshëm, por të domosdoshëm”.
Pushtimi rus i Ukrainës i ka dhënë një ndjenjë të re urgjence nevojës për të afruar Malin e Zi, Serbinë, Shqipërinë, Maqedoninë e Veriut, Bosnjën dhe Kosovën më afër BE-së 27-anëtare, pjesërisht për të kundërshtuar rritjen e ndikimit rus dhe kinez në rajon.
Afrimi mund të përfshijë anëtarësim të plotë ose një komunitet alternativ. Në një artikull të botuar në “Politico” përpara një samiti në Greqi të Procesit të Bashkëpunimit të Evropës Juglindore (SEECP), Mitsotakis tha se BE-ja duhet të provojë se kur “parashtron një vizion, ajo ka synimin dhe kapacitetin për ta ndjekur”.
Vizioni i pranimit në BE për rajonin, tha ai, është bërë “i paqartë, duke u zbehur në sytë e qytetarëve të frustruar dhe të zhgënjyer” pasi zgjerimi i BE-së ka ngecur vitet e fundit për shkak të shqetësimeve të sigurisë, qeverisjes dhe migracionit.
Një samit BE-Ballkani Perëndimor është planifikuar më 23 qershor.
“Mesazhi im sot është i qartë: Në përputhje me kriteret e përcaktuara, le të ofrojmë integrimin e të gjithë Ballkanit Perëndimor në BE deri në vitin 2033 – një afat kohor ambicioz, por i arritshëm. Kjo është shumë e vonuar”, tha Mitsotakis.
“Hapi i parë duhet të jetë një vendim brenda dy javësh në Bruksel për të zhbllokuar rrugën e Maqedonisë së Veriut dhe Shqipërisë”. Nisma e Mitsotakis nënvizoi se si Greqia është përpjekur të rrisë rolin e saj në Ballkan pasi ka dalë nga një krizë financiare që njollosi imazhin e saj.
