Përfaqësuesit e Rusisë, Ukrainës, Francës dhe Gjermanisë, të mbledhur në Paris të mërkurën, përsëritën angazhimin e tyre për një armëpushim të rënë dakord në marrëveshjen e Minskut.
“Ata mbështesin pa kushte respektimin e armëpushimit (…) pavarësisht nga dallimet në çështjet e tjera që lidhen me zbatimin e marrëveshjeve të Minskut” thanë ata në një deklaratë të postuar në faqen e internetit të presidencës franceze.
Në të njëjtën kohë, i dërguari special rus për konfliktin në Ukrainë, Dmitry Kozak tha se Rusia dhe Ukraina do të vazhdojnë bisedimet e tyre nën ndërmjetësimin franko-gjerman brenda dy javësh në Berlin, pas bisedimeve “jo të thjeshta” sot në Paris.
“Pavarësisht dallimeve në lexim, armëpushimi duhet të vazhdojë, armëpushimi duhet të ruhet” midis ushtrisë ukrainase dhe separatistëve pro-rusë në Ukrainën lindore, shtoi Kozak në fund të një takimi të përfaqësuesve të katër krerëve të shteteve në Elysee.
“Rusia dëshiron që Ukraina të shfuqizojë një ligj që lejon ushtrime ushtarake të huaja në territorin e saj”, shtoi i dërguari special rus.
Moska është e gatshme të ushtrojë ndikim mbi separatistët në Ukrainën lindore. Megjithatë, separatistët po përmbushin detyrën e tyre. “Stërvitjet ushtarake perëndimore që zhvillohen pranë kufirit rus nuk kanë të bëjnë fare me sigurinë e Ukrainës”, tha Kozak.
