Kompania Meta ka dhuruar 1 milion dollarë në fondin inaugurues të Presidentit të zgjedhur Donald Trump, ka konfirmuar kompania për CNN.
Lajmi vjen dy javë pas takimit privat të CEO-së së Meta-s, Mark Zuckerberg, me Trump në Mar-a-Lago. Dhurimi u raportua fillimisht nga The ëall Street Journal.
CNN ka raportuar se Zuckerberg po synon një rol më aktiv në formësimin e politikave teknologjike të administratës së ardhshme. Kjo përfaqëson një kthesë të madhe nga pothuajse katër vite më parë, kur Meta ndaloi Trump nga platformat e tij pas kryengritjes së 6 janarit 2021.
Para zgjedhjeve, Zuckerberg kishte shfaqur gradualisht një afrimitet më të madh me Trump. Në një intervistë gjatë verës, themeluesi i Facebook tha se reagimi i Trump ndaj një përpjekjeje për atentat në korrik ishte “i jashtëzakonshëm.”
“Të shihje Donald Trump të ngrihej pasi u qëllua në fytyrë dhe të ngrinte grushtin lart me flamurin amerikan është një nga gjërat më të jashtëzakonshme që kam parë ndonjëherë në jetën time,” tha ai gjatë një interviste në podcast-in “The Circuit” në selinë e Meta-s në Menlo Park, Kaliforni.
Një numër drejtuesish të lartë në disa nga kompanitë më të mëdha të teknologjisë në Amerikë — përfshirë Tim Cook të Apple, Sundar Pichai të Google dhe Andy Jassy të Amazon — kishin kërkuar takim me Trump para Ditës së Zgjedhjeve në nëntor, duke synuar të siguronin një audiencë me kandidatin presidencial gjatë një gare tepër të fortë.
Nga ana e tij, Trump duket se ka shijuar marrëdhëniet e ngrohta me titanët e teknologjisë. Ai ka mburrur bisedat private me ta në intervista dhe paraqitje dhe tani lavdëron kompanitë që dikur fajësoi për humbjen e tij në zgjedhjet e 2020-s, e cila kishte sjellë vite të sulmeve të drejtuara nga republikanët kundër kompanive teknologjike.
Deri në mars, Trump e kishte quajtur Facebook një “armik të popullit” në një intervistë me CNBC, duke bërë që aksionet e Meta-s, kompania mëmë, të bien më shumë se 4% në ditën e publikimit. Trump gjithashtu më parë kishte kërcënuar të burgoste “mashtruesit e zgjedhjeve,” duke përfshirë Zuckerberg, të cilin dukej se e referoi në një postim në korrik në platformën e tij Truth Social.
Top Channel
