Zbutja e masave anti-COVID në Britani të Madhe që do të duhej të aplikoheshin nga 21 qershori, janë shtyrë edhe për katër javë tjera.
Këtë e ka konfirmuar kryeministri i këtij vendi Boris Johnson gjatë një konference për media, transmeton Telegrafi.
Hapi i fundit i zbutjes së masave nënkuptonte heqjen e çfarëdo kufizimi në Britani të Madhe – por një gjë e tillë do të shtyhet deri më 19 korrik.
E për këtë vendim ka ndikuar varianti indian i COVID-19 i njohur si Delta, që po përhapet nëpër Angli, pasi që numri i të infektuarve është rritur për 49 për qind brenda një jave, e i atyre të hospitalizuar në 15 për qind.
Qeveria planifikonte të zbuste masat nga 21 qershor – siç është distanca fizike sociale, hapja e pabeve dhe restoranteve. Gjithashtu ishte paraparë të hapen klube e natës dhe aktivitetet sportive dhe muzikore të mos i kushtojnë edhe aq rëndësi distancës fizike.
