Rajoni i Hanoverit në Gjermani ka lëshuar një licencë zyrtare për të vrarë ujkun që vrau një nga kuajt e presidentes së Komisionit Evropian, Ursula von der Leyen, shkruan Euroaktiv.
Ajo më herët deklaroi se pushteti ekzekutiv i Bashkimit Evropian, do të rishikojë statusin e mbrojtur të ujqërve, transmeton Telegrafi.
Kali Dolly u mbyt nga një ujk në fillim të shtatorit, kur ishte duke kullotur së bashku me një kalë tjetër të vogël në pronësi të familjen së Von der Leyen pranë Hanoverit në veri të Gjermanisë.
“E gjithë familja është tejet e shqetësuar nga lajmi”, tha zëdhënësi i atëhershëm i kryetares të Komisionit, dhe tani organet kompetente kanë lejuar vrasjen e ujkut në fjalë.
Ujku është quajtur problematik, një koncept në legjislacionin gjerman për mbrojtjen e natyrës që zbatohet kur një ujk sulmon në mënyrë të përsëritur bagëtinë ose rrezikon njerëzit dhe kafshët e tjera dhe lehtëson lëshimin e një leje gjuetie të jashtëzakonshme.
Sipas zëdhënësit, përveç kalit të vogël, ujku mbyti gjithsej 12 dele dhe lopë. Megjithatë, ai nuk komentoi nëse ishte vdekja e Dollyt që shkaktoi lëshimin e lejes për vrasje.
Von der Leyen tha në një letër drejtuar ligjvënësve konservatorë gjermanë javën e kaluar, se Komisioni do të rishikonte statusin e mbrojtur të ujqërve. Edhe pse ajo nuk e përmendi në mënyrë specifike kalin e saj në letër, e cila u citua nga agjencia gjermane e lajmeve dpa, ajo tha se Komisioni “e pranon se kthimi i ujkut dhe numri i tij në rritje çojnë në probleme”.
