Presidenti i Emirateve të Bashkuara Arabe, Sheikh Mohammed Bin Zayed, mbërriti mbrëmjen e djeshme në Tiranë për një takim zyrtar.
Sheikh Mohammed Bin Zayed u prit në aeroportin ndërkombëtar “Nënë Tereza” në Rinas nga kryeministri Edi Rama, i cili mëngjesin e sotëm ndau në rrjetet sociale disa foto nga pritja.
“MIRËMËNGJES ???? dhe me mbërritjen mbrëmë në Shqipëri të një miku të vjetër e të shtrenjtë të popullit shqiptar, këtej e andej bjeshkëve, ju uroj një ditë të mbarë”, shkruan kreu i qeverisë.
Mësohet se gjatë takimit me kryeministrin Edi Rama dhe presidenti i Emirateve të Bashkuara Arabe, ka diskutuar mbi mënyrat për të zgjeruar më tej marrëdhëniet dypalëshe.
Duke i uruar mirëseardhjen Presidentit dhe delegacionit shoqërues në Zyrën e Kryeministrit, Rama shprehu besimin se kjo vizitë do të ndihmojë në krijimin e rrugëve të reja të bashkëpunimit dhe do të çojë përpara ambiciet për zhvillim të të dy vendeve.
Në takim u diskutua edhe mundësia për bashkëpunimtë mëtejshëm, veçanërisht në sektorë prioritarë, duke përfshirë ekonominë, tregtinë, energjinë e rinovueshme, sigurinë ushqimore dhe teknologjinë.
Të dyja palët shkëmbyen pikëpamje mbi një sërë çështjesh rajonale dhe ndërkombëtare me interes të ndërsjellë, duke theksuar rëndësinë e dialogut dhe diplomacisë në zgjidhjen e konflikteve.
Ata nënvizuan nevojën për një bashkëpunim më të fortë ndërkombëtar për të promovuar paqen, stabilitetin dhe sigurinë si në nivel rajonal ashtu edhe në atë global.
