Prokuroria e Posaçme Kundër Korrupsionit dhe Krimit të Organizuar, Struktura më e rëndësishme hetimore në vend, pranoi të enjten se është bërë pre e një krimi kibernetik. Dy ish-zyrtarë publikë dyshohet se kanë mundur të thyejnë fjalëkalimet e postës elektronike të tre prokurorëve të SPAK, duke marrë prej aty materiale sekreti hetimor.
Ngjarja në përmasat e një skandali është regjistruar mbrëmjen e 12 marsit 2025. SPAK njoftoi zyrtarisht se këtë ditë ishte vënë në shënjestër të një ndërhyrjeje të paligjshme në adresat e e-maileve të prokurorëve të Posaçëm. Sipas SPAK, falë masave të sigurisë nuk është arritur të ndërhyhej në sistemin e brendshëm të institucionit.
Nga verifikimet, tha SPAK, ka rezultuar se është ndërhyrë vetëm në adresat e e-maile-ve të disa prokurorëve, por jo në sistemin e përgjithshëm të IT-së të institucionit. Personat përgjegjës kanë arritur të marrin disa informacione, pa mundur të sigurojnë akses në dosje hetimore. Po ashtu, nënvizoi SPAK, ata kanë tentuar të ndërhyjnë edhe në email-in e Drejtuesit të Prokurorisë së Posaçme, Z. Altin Dumani, por pa sukses.
Në reagimin e SPAK, thuhet se hetimi i nisur pas rastit identifikoi brenda 24 orëve dy persona, si përgjegjës për ngjarje, individin që ka realizuar ndërhyrjen në email dhe atë që e ka shpërndarë informacionit tek persona të tretë, por pa zbuluar emrat e tyre. Në burime jozyrtare A2 ka mësuar së ata janë Zambak Gjoni, ish-zyrtar i Burgut të Fierit dhe Arnold Rrokaj, ish-zyrtar i IMT. Pas arrestimit, me kërkesë të SPAK ata janë lënë në masën e sigurisë “arrest në burg” për akuzën e “ndërhyrjes së pa autorizuar” dhe “nxjerrje të sekretit hetimor”.
Adresat elektronike të sulmuara i përkasin prokurorëve të posaçëm, Enkeleda Millona, Elida Kaçkini e Behar Dibra.
SPAK tha se pas arrestimit të dy të dyshuarve është bërë i mundur sekuestrimi i pajisjeve të përdorura për të realizuar ndërhyrjen, si edhe skedarët e shkarkuar, ndërkohë që deri në këtë fazë të hetimit nuk ka të dhëna që ata të kenë bashkëpunuar me personel të brendshëm të SPAK.
Një pjesë e materialeve hetimore të shkarkuara nga e-mailet e prokurorëve i janë dërguar dy gazetarëve, të cilët, me qëllim ruajtjen e sekretit hetimor, janë urdhëruar nga SPAK të mos u publikojë ato. Ndërkohë janë marrë në pyetje edhe individë të tjerë, që mund të kenë pasur lidhje me personat e arrestuar, që i kanë zotëruar këto informacione. Sipas Prokurorisë së Posaçme hetime për këtë çështje vijojnë në kuadër të dyshimeve për ekzistencën e një grupi të strukturuar kriminal. (A2 Televizion)
