Ylli i Real Madrid, Gareth Bejl ka rënë pre e një sulmi nga ana e tifozëve madrilen në dalje të qendrës stërvitore pas stërvitjes me klubin, ku disa tifozë të inatosur nuk nguruan të godasin makinën e uellsianit me stilolapsa.
Tifozët e pritën te dalja e qendrës stërvitore duke iu drejtuar me fjalët ” ik p****”, ndërsa njëri prej tyre lëshoi një stilolaps drejt makinës së uellsianit. Bejl u aktivizua me Uellsin në sfidën ndaj Bjellorusisë, por u dëmtua dhe tani do t’i mungojë madrilenëve për 3 javë. Kjo ka inatosur shumë tifozët e Realit, pasi 32-vjeçari nuk është aktivizuar për skuadrën e Ançelotit që nga gushti.
Aktivizimi me Uellsin ka sjellë një lumë kritikash për sulmuesin i cili siç shikohet në video nuk duket shumë i kënaqur. Bejl u transferua në vitin 2013 nga skuadra e Totenhemit për shumën rekord të 91 milionë eurove, ndërsa vitin e kaluar u rikthye sërish te spërsat në formë huazimi.
Kontrata e uellsianit me madrilenët përfundon vitin tjetër, dhe sipas gjasave, Bejl duhet të fillojë të kërkojë një skuadër të re pasi në Madrid nuk është më i dëshiruar.
