Kryeparlamentarja Elisa Spiropali gjatë takimit të dytë të lartë “Shqipëria 2030 në BE-Rruga e Reformave”, tha se vendi ynë nuk ka qenë më pranë se kurrë Bashkimit Evropian, dhe Unioni nuk ka qenë më i qartë se kurrë për progresin e vendit tonë drejt Evropës.
“Asnjëherë Shqipëria dhe shqiptarët nuk kanë qenë kaq afër, të qartë dhe të vendosur në rrugëtimin e tyre drejt familjes evropiane. Asnjëherë BE nuk ka qenë kaq i bindur dhe qartësisht për progresin dhe anëtarësimin e Shqipërisë. Jemi në një momentum historik që po e shfrytëzojmë për ta vendosur brenda kësaj dekade yllin e Shqipërisë mes 27 yjeve të Evropës. Tashmë që forcat politike kanë zbritur në fushë për 11 maj ta konsiderojmë këtë fushatë zgjedhore si mundësi për t’u bashkuar më shpejt familjes tonë të natyrshme evropiane.”, u shpreh Spiropali.
Më tej ajo tha se Kuvendi do të vazhdojë të mbështesë reformën në drejtësi. “Kuvendi po forcon mbikëqyrjen, llogaridhënien, eficencën duke kontribuuar që qeverisja e hapur të synojë ndërveprimin e të treja degëve, ekzekutive, legjislative dhe gjyqësore. Një qeverisje për qytetarët realizohet në bashkëpunim edhe me mbështetjen dhe konsensusin e tyre. Po ndërtojmë platformën e madhe të konsultimit dhe raportimit të institucioneve të pavarura, të gjithë shqyrtimit të legjislacionit me të cilin merret kuvendi, përmirësimi i kontrollit dhe transparencës së lobimit, sistemi i integruar, rregullimet që lehtësojnë ushtrimin e të drejtës së qytetarëve për peticione.”, shtoi më tej ajo.
