Numri i të vdekurve nga tërmeti i fuqishëm që goditi Mianmarin javën e kaluar ka tejkaluar 3000, me qindra njerëz ende të zhdukur, pasi në vend parashikohen reshje të dendura shiu që mund të pengojnë përpjekjet e shpëtimit dhe shpërndarjes së ndihmave.
Tërmeti me magnitudë 7.7 Rihter që goditi Mianmarin të premten ishte më i forti që goditi rajonin në një shekull.
Gjashtë rajone të vendit, ku jetojnë 28 milionë njerëz, janë vendet që u goditën më e rëndë, me ndërtesa të shembura, komunitete të tëra të rrafshuara dhe banorë të mbetur pa ushqim, ujë dhe strehim.
Dje të mërkurën, ambasada japoneze në Mianmar njoftoi përmes Facebook-ut se numri i të vdekurve ka arritur në 3,003, ndërsa 4,515 të tjerë janë plagosur dhe 351 janë të zhdukur.
Ndërkohë, meteorologët paralajmërojnë se në Mianmar priten reshje të pazakonta nga e diela deri më 11 prill në zonat veçanërisht të prekura nga tërmeti, si Mandalay, Sagaing dhe Naypyidaw.
“Po vjen shi dhe ka ende shumë njerëz të varrosur në rrënoja”, tha një shpëtimtar.
“Dhe veçanërisht në Mandalay, nëse fillon të bjerë shi, njerëzit që janë të bllokuar do të mbyten, edhe nëse kanë mbijetuar deri më tani,” shtoi ai.
Në postimin e saj, ambasada japoneze shtoi se deri më tani janë kryer 53 fluturime për transportin e ndihmave në Mianmar, ndërsa më shumë se 1900 shpëtimtarë janë dërguar në vend nga 15 vende, përfshirë Kinën, Indinë dhe Rusinë.
Ndërkohë, udhëheqësi i juntës Min Aung Hlaing do të udhëtojë sot në Bangkok për të diskutuar përgjigjen ndaj tërmetit si pjesë e samitit të Nismës së Gjirit të Bengalit për Bashkëpunim Teknik dhe Ekonomik Multi-Sektorial (Bimstec), i cili përfshin Bangladeshin, Butanin, Indinë, Mianmarin, Nepalin, Sri Lankën dhe Tajlandën.
