Transportimi i migrantëve që hyjnë në territorin shqiptar në mënyrë të paligjshme me qëllim kalimin për në vendet e BE-së ka aktivizuar në terren persona të shumtë që transportojnë ata. Kështu edhe ditën e sotme janë ndaluar dy shtetas shqiptarë të cilët u kapën në flagrancë për transportimin e 7 shtetasve të huaj nga vendet treta kryesisht nga Lindja e Mesme.

Në pranga kanë rënë shtetasit L. Gj., 33 vjeç, banues në Durrës dhe G. G., 36 vjeç, banues në Fier.

Ata u kapën në aksin Librazhd-Elbasan.

Njoftimi i policisë:

Vijojnë goditjet e njëpasnjëshme ndaj veprimtarisë kriminale në fushën e dhënies ndihmë për kalim të paligjshëm të kufirit, kundrejt fitimit.

Vihen në pranga 2 shtetas, pasi u kapën në flagrancë duke transportuar 7 shtetas të huaj nga vendet e treta.

Në zbatim të detyrave të përcaktuara në planin e masave të hartuar nga DVP Elbasan, për të parandaluar dhe goditur aktivitetin e paligjshëm të dhënies ndihmë shtetasve të huaj për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, specialistët për Hetimin e Trafiqeve të Paligjshme në DVP Elbasan, në bashkëpunim me shërbimet e Policisë Librazhd, pas informacioneve të marra në rrugë operative se dy shtetas po transportonin nga Korça, disa shtetas nga vendet e treta, me qëllim dhënien ndihmë për kalim të paligjshëm të kufirit, kundrejt fitimit 200 euro për person, kapën dhe arrestuan shtetasit:

L.Gj., 33 vjeç, banues në Durrës dhe G. G., 36 vjeç, banues në Fier.

Këto shtetas u kapën nga shërbimet e Policisë, në aksin rrugor Librazhd-Elbasan, duke transportuar 7 shtetas të huaj me mjetin e tyre.

Materialet hetimore i kaluan Prokurorisë pranë Gjykatës së Shkallës së Parë Elbasan, për veprime e mëtejshme.