Vrasja e studentes shqiptare Ilaria Sula në Romë ka tronditur opinionin publik italian dhe shqiptar. Autori i dyshuar, ish-i dashuri i saj Mark Samson, ka pranuar krimin, por hetuesit dyshojnë se nuk ka vepruar i vetëm.
Mediat italiane kanë zbardhur dëshminë e prindërve të Mark Samson, autorit të vrasjes së studentes shqiptare Ilaria Sula. Gruaja dhe bashkëshorti i saj mund të hetohen për bashkëpunim në vrasje dhe fshehje kufome.
Trupi i 23-vjeçares u gjet në një greminë në Capranica Prenestina, pas një tentative për fshehje të kufomës në një valixhe. Krimi dyshohet të ketë ndodhur në banesën e familjes Samson, në prani të prindërve të Markut, Nors dhe Rik Samson, të cilët pretendojnë se nuk kanë dëgjuar asgjë.
“Ne ishim në shtëpi, e dinim që vajza ishte me Markun. Natën e 25 marsit ishim të dy në shtëpi. E dinim që Ilaria kishte ardhur për të vizituar Markun”, pohuan ata. Megjithatë, babai ka thënë më parë se kishte dalë dhe nuk ishte kthyer deri të nesërmen.
Nëna e Markut kishte shprehur pakënaqësi për lidhjen e djalit me Ilarian, duke thënë se “e shpërqendronte nga studimet”.
“Nuk doja që Mark ta sillte gjithmonë Ilarian në shtëpi. Kisha frikë se do ta shpërqendronte shumë – djali im duhet të jetë i përqendruar te studimet”, i ka rrëfyer ajo hetuesve.
Më shumë se konflikte të zakonshme, bëhet fjalë për një armiqësi të heshtur ndaj vajzës, ndoshta e lidhur me bindjet fetare të nënës
Hetuesit po shqyrtojnë nëse ajo dhe bashkëshorti kanë ndihmuar në krim apo në fshehjen e tij. Dëshmitë e tyre janë kontradiktore dhe të paplota, duke ngritur dyshime për bashkëpunim.
Dy javë pas vrasjes, prindërit e ish-të dashurit të viktimës nuk kanë mundur ende të shpjegojnë qartë se çfarë kanë bërë gjatë atyre 24 orëve dhe cili ka qenë roli i tyre në veprimet e të birit: të vrasë një vajzë të mbyllur me çelës në dhomën e tij, më pas – gjatë ditës – ta fusë trupin në një valixhe, pasi e ka mbështjellë me një qese plastike, ta ngarkojë në makinën e familjes – në rrugë, jo në ndonjë garazh – dhe ta çojë për ta hedhur në një greminë 40 kilometra larg Romës.
Dyshimet ndaj Nors dhe Rik Samsonit konsiderohen mëse të justifikuara, edhe për faktin që duket shumë e vështirë të besohet se Mark e ka kryer të gjithë këtë krim i vetëm. Tani edhe marrëdhënia mes nënës dhe ish-të dashurës së të birit është nën lupën e hetuesve.
