Maqedonia e Veriut është përfshirë nga një skandal teksa në pranga të autoriteteve ka rënë një prej pjesëtarëve të sigurimit të kryeministrit Hristijan Mickoski.
Angel Samarakov, gjithashtu ish-punonjës i Ministrisë së Brendshme, është arrestuar në flagrancë teksa është kapur duke dhënë informacione konfidenciale tek disa persona ende të paidentifikuar në lagjen e Shkupit, “Grcec”.
Kjo lagje njihet gjerësisht si e kontrolluar nga grupe kriminale të organizuara, ndërsa lajmi është konfirmuar nga vetë Ministria e Brendshme. Ajo çka vijon të jetë ende e paqartë, është përmbajtja e informacioneve që Samarakov ka shpërndarë tek persona të tjerë të paautorizuar.
Kjo nuk është hera e parë që një pjesëtar i sigurimit të Mickoskit përfshihet në një incident të rëndë. Vetëm pak muaj më parë, shefi i sigurimit të tij, Ivica B., ka sulmuar fizikisht një koleg polic i cili ishte në detyrë në orët e para të mëngjesit.
