Giorgia Meloni pësoi një tjetër disfatë politike në Parlament, ku reforma zgjedhore e propozuar nga kryeministrja e djathtë e Italisë u refuzua, pavarësisht se partnerët e koalicionit kishin premtuar mbështetjen e tyre.
Amendamenti që kërkonte qeveria e saj u rrëzua me një diferencë minimale votash, 188 vota kundër dhe 187 pro, duke i dhënë opozitës një argument të ri për ta sulmuar politikisht. Ky rezultat konsiderohet një goditje për Melonin, e cila prej kohësh synon një reformë të thellë të sistemit zgjedhor.
Objektivi i saj është që në të ardhmen kryeministri të zgjidhet drejtpërdrejt nga qytetarët dhe partia fituese të përfitojë një bonus mandatesh për të siguruar stabilitet qeverisës. Megjithatë, amendamenti i votuar nuk kishte të bënte me të gjithë paketën e reformës, por vetëm me mundësinë që zgjedhësit të favorizonin kandidatë të caktuar në listat e partive përmes votës preferenciale.
Pikërisht kjo pikë u rrëzua në votimin e fshehtë, duke treguar se edhe brenda shumicës qeverisëse pati deputetë që nuk e mbështetën propozimin. Menjëherë pas votimit, opozita kërkoi dorëheqjen e Melonit dhe mbajtjen e zgjedhjeve të parakohshme. Disfata konsiderohet veçanërisht e ndjeshme, pasi partnerët e koalicionit, Forza Italia dhe Lega, kishin deklaruar publikisht se do ta mbështesnin amendamentin. Duke qenë se koalicioni disponon shumicën në Parlament, rezultati lë të kuptohet se një pjesë e deputetëve të kampit qeverisës votuan kundër.
Pas humbjes, Meloni reagoi shkurt, duke deklaruar: “E provuam. Edhe një herë fitoi moçali.”Italia pritet të zhvillojë zgjedhje parlamentare vitin e ardhshëm, ndërsa sondazhet vazhdojnë ta rendisin Melonin dhe partinë e saj në krye të preferencave të elektoratit.
