Sekretari i Përgjithshëm i PD, Gazment Bardhi, ka reaguar pas dorëheqjes së Lulzim Bashës nga posti i kryetarit të partisë Demokratike. Nëpërmjet një deklarate Bardhi bën të ditur se ka pasur një takim urgjent me nënkryetarët, Jorida Tabakun, Enkelejd Alibeajn dhe Kryetaren e Këshillit Kombëtar të PD znj. Arta Sakja.
Mes të tjerash, Bardhi njofton se pasi Jordia Tabaku kishte hequr dorë nga e drejta e saj për t’u propozuar si drejtuese në mbledhjen e Këshillit Kombëtar, atëherë kryetari i komanduar i partisë Demokratike do të ishte Enkelejd Alibeaj deri në vendimmarrjen e institucioneve të PD.
NJOFTIM I SEKRETARIT TË PËRGJITHSHËM TË PARTISË DEMOKRATIKE, GAZMENT BARDHI
Pasi jam njohur me deklaratën e Kryetarit të Partisë z. Lulzim Basha se ka vendosur të hedhë një hap pas duke u dorëhequr nga detyra e kryetarit të PD për të ndihmuar në ringritjen e PD, kam thirrur në një takim urgjent pune për të diskutuar për situatën Nënkryetarët e Partisë znj. Jorida Tabaku dhe z. Enkelejd Alibeaj, si dhe Kryetaren e Këshillit Kombëtar të PD znj. Arta Sakja.
Në mbështetje të Statutit të Partisë dhe për të mos krijuar asnjë vakuum në drejtimin e Partisë në këtë moment të vështirë dhe specifik, kam konsultuar të dy Nënkryetarët me qëllim paraqitjen për zgjedhjen menjëherë nga Këshilli Kombëtar të komandimit të njërit prej tyre për drejtimin e Partisë.
Në takim kam marrë konfirmimin e Nënkryetares znj. Tabaku se heq dorë nga e drejta statutore për t’u propozuar në Këshillin Kombëtar për drejtimin e Partisë. Për pasojë, në përputhje me nenit 46 të Statutit, drejtimi i partisë në këtë periudhë tranzitore, deri në vendimmarrjen e institucioneve të partisë, do të behet nga Nënkryetari i Partisë dhe Kryetari i Grupit Parlamentar z. Enkelejd Alibeaj.
