Kylian Mbappé tregoi të martën mbrëma se ato 200 milionë euro, që Florentino Pérez ofroi më 31 gusht 2021, ishin më se të justifikuara. Projekti i këtij Real Madridi ishte ta kishte sulmuesin francez në përbërje, diçka që sheikët nga Katari nuk e lejuan, edhe duke e ditur që e ardhmja e Mbappe kalonte nga “Bernabeu”.
Asgjë nuk ka ndryshuar. Askush nuk e pranon publikisht, por të gjitha palët e dinë se francezi ka vendosur që ekipi i tij i ardhshëm të jetë Real Madridi. Do të largohet falas nga PSG, por nuk do të mbërrijë me parametra zero te “Los Blancos”.
Këtë zgjedhje, 23-vjeçari do ta bëjë në këmbim të një bonusi të majmë nënshkrimi, por pas asaj që u pa në ndeshjen e së martës, çmimi është më pak i rëndësishëm. Sigurisht, asnjë euro për PSG-në, siç është dëgjuar vazhdimisht në zonën fisnike të “Bernabeu”.
Mbappé u pyet pas ndeshjes dhe fjalët e tij nuk kanë ndryshuar. Ai po pret momentin e duhur për të zbuluar të ardhmen. Dhe nuk do të ndryshojë qasje deri në fund të sezonit. Kylian pohoi se asgjë nuk është vendosur, por të gjithë e kuptojnë se nuk është kështu. Buzëqeshja e tij e “tradhton”, sidomos intervistat në një spanjishte të pastër. Fytyra e Al Khelaifit (presidentit të PSG-së), në prani edhe të Florentino Perezit, është “lakmuesi” më i qartë për situatën.
Ndeshja në “Parc des Princes” ka shërbyer shumë. Gjëja e parë dhe më e rëndësishme; ka treguar se Kylian Mbappé është aktualisht lojtari më vendimtar në futbollin botëror. Ai ishte në gjendje të mposhtte Real Madridin i vetëm, pasi e çoi skuadrën e bardhë në limite. Futbolli i tij është i tillë.
Mbappe këmbënguli deri në minutën e fundit, kur lojtarët e ekipit madrilen nuk mund të bënin më. Në këtë ndeshje, përpjekjet e Lucas Vázquez, Militao, Valverde dhe Courtois, të dëshpëruar për pamundësinë e ndalimit të sulmuesit, dështuan.
