Stina e dimrit po afron dhe për banorët e qytetit të Kukësit, shqetësim kryesor është sigurimi i druve të zjarrit për ngrohje. Një pjesë e mirë e kuksianëve janë të papunë dhe trajtohen me ndihmë ekonomike dhe nuk kanë mundësi për të blerë dru.
Më të vështirë e kanë edhe familjet që jetojnë me pensionet e kryefamiljarëve. Nga ana tjetër, edhe çmimi në treg i druve të zjarrit është rritur ndjeshëm, ndërsa sigurimi i tyre është një sfidë më vete për shkak të moratoriumit dhe zjarreve që dogjën sipërfaqe të tëra me pyje.
Kjo situatë është kthyer në shqetësim për qytetarët kuksianë për vitet e fundit, të cilët çdo ditë e më shumë po iu vështirësohet jetesa edhe nga rritja e çmimeve.
Ndërkohë Bashkia Kukës bën të ditur se pas datës 15 tetor do të hapet pika e tregtimit të druve nga kompania që do të fitojë tenderin e shpallur ditë më parë.
