Ky vit rezulton të jetë një verë e zjarrtë, si për Europën ashtu edhe për të gjithë planetin. Në Geria Epir, javët e fundit temperaturat jashtëzakonisht të larta kanë pasur efekte shkatërruese.
Sipas programit të vëzhgimit të tokës “Copernicus” të Bashkimit Europian, numri i përgjithshëm i zjarreve në BE, nga 1 janari deri më 23 korrik të këtij viti ishte katërfishi i mesatares së 15 viteve të fundit.
Kjo praktikisht do të thotë se në këtë periudhë kohore, në vitin 2022 në BE janë regjistruar 1,926 zjarre në pyje, ndërsa mesatarja për të njëjtën periudhë nga viti 2006 deri në vitin 2021 ishte vetëm 520.
Rritja e zjarreve në pyje është e lidhur me ndryshimet klimatike, të cilat shkaktojnë periudha të zgjatura të nxehtit dhe thatësirës. Sot, zjarret veçanërisht intensive vazhdojnë të shkatërrojnë vendet europiane. Në zemër të kontinentit, pylli kombëtar i Zvicrës, në kufirin midis Republikës Çeke dhe Gjermanisë, është kthyer në një ferr, raporton abcnews.al.
Zjarri është aktiv që nga fundjava e kaluar, edhe pse qindra zjarrfikës gjermanë dhe çekë po bëjnë përpjekje për ta vënë nën kontroll. Avionët dhe helikopterët hodhën më shumë se 100 ton ujë, por ditën e djeshme pati një shpërthim të ri.
Programi i OKB-së për Mjedisin lëshoi një deklaratë, duke theksuar se zjarret e sivjetme në pyje në Europë, Amerikën e Veriut dhe shumë rajone të tjera të Tokës nuk janë një fenomen normal, por përkundrazi, diçka krejtësisht e panatyrshme.
Njëkohësisht, ka një shqetësim të vërtetë jo vetëm për numrin e viktimave dhe pronave, por edhe për shkatërrimin masiv të tokave të punueshme, veçanërisht në një kohë kur bota është rrënuar nga kriza ushqimore dhe thatësira.
Pasojat e zjarreve në pyje, theksohet, rëndojnë atmosferën me ndotës duke rritur rreziqet për shëndetin e njeriut dhe biodiversitetin. Nuk ka dyshim, se zjarret në pyje janë pasojë e ndryshimeve klimatike. Ngrohja e mjedisit do të shkaktojë një rritje prej 14% të zjarreve në pyje deri në vitin 2030, 30% deri në vitin 2050 dhe 50% deri në fund të shekullit.
Qeveritë në mbarë botën kanë për detyrë të reduktojnë emetimin e gazrave, të cilët janë përgjegjës për ngrohjen globale, dhe të kujdesen për restaurimin e ekosistemeve të dëmtuara.
“Në një botë në zjarr, ne të gjithë duhet të bëhemi zjarrfikës,” përfundon Programi i OKB-së për Mjedisin.
/abcnews.al
