Presidenti i vendit Ilir Meta ka reaguar në lidhje me ngjarjen e rëndë që ndodhi ditën e djeshme në Fier, ku u rrëmbye dhe u vra një 8-vjeçar.
Meta shprehet se kjo ngjarje duhet të jetë një kambanë alarmi për të gjitha instituicionet, dhe të gjenden bashkëpërgjegjësit e Klodian Çalamanit .
Ky i fundit u lirua nga burgu pavarësisht se kishte tentuar që të abuzonte me një të mitur, duke u dënuar me vetëm 4 vite heqje lirie.
Presidenti Meta:
Vrasja e të miturit ditën e djeshme në qytetin e Fierit, nga një person me precedentë penalë, është thirrje alarmuese për institucionet shtetërore dhe tregues i mosfunksionimit të zinxhirit të sistemit, nga vënia e drejtësisë, deri te ndëshkimi e më pas rehabilitimi.
Krimi makabër i djeshëm, që i mori jetën një fëmije të pafajshëm, ka autor, por ka dhe bashkëpërgjegjës, që nuk kanë përmbushur detyrimet shtetërore, duke krijuar terrenin për këtë vepër penale.
Nuk mjafton, që përfaqësuesit e institucioneve të dalin me shprehje tronditëse për ngjarjen dhe ta dënojnë atë.
Duhen ndërmarrë nisma konkrete për të forcuar hetimin, parandalimin e veprave të tilla nga individë, që dukshëm kanë premisat për të qenë recidivistë dhe për t`u përfshirë në krim, dhe për të cilët sistemi rehabilitues penitenciar dhe i post vuajtjes së dënimit, nuk ka funksionuar.
Nuk kam fjalë për të ngushëlluar familjen e të voglit Mateo. Zoti dhe drejtësia ua lehtësoftë dhembjen!
