Ndërsa shumica e fuqive globale kanë dënuar ashpër veprimet e Vladimir Putinit në Ukrainë, përgjigja e Indisë ka qenë disi e heshtur – një reflektim i dilemës diplomatike në të cilën ndodhet vendi tani: i ndarë midis Rusisë dhe Perëndimit.
Siç shkruan korrespondentja e Guardian në Azinë juglindore, Hannah Ellis-Petersen, disa orë pas fillimit të pushtimit të Putinit, kryeministri indian Narendra Modi ishte ndër të parët që thirri presidentin rus, duke bërë thirrje për një “ndërprerje” të dhunës, por duke u larguar nga dënimi i drejtpërdrejtë i veprimeve të tij. Kryediplomati i Indisë në OKB ishte po aq evaziv, duke shprehur “keqardhje” për pushtimin dhe duke bërë thirrje për “zhvlerësim urgjent të tensioneve”.
India aktualisht mbështetet në Rusi për rreth 60%-70% të armëve dhe pajisjeve të saj ushtarake, të cilat janë thelbësore në një kohë kur ato janë të përfshira në një përballje të ftohtë me Kinën përgjatë kufirit të tyre. India së fundmi bleu një sistem mbrojtjeje raketore nga Rusia dhe mbështetet në të për pjesë rezervë thelbësore për makineritë mbrojtëse.
Putin bëri një vizitë në Indi në dhjetor 2021, një nga të vetmet vende ku Presidenti rus ka udhëtuar gjatë pandemisë, një shenjë e lidhjeve të ngushta midis dy vendeve. India gjithashtu mbështetet te Rusia për furnizime jetike me plehra dhe sanksionet e ashpra ndaj Rusisë mund të ndikojnë rëndë në bujqësinë dhe industrinë indiane.
Të premten, i ngarkuari rus me punë në Delhi, Roman Babushkin, tha se ata “presin që partnerët tanë indianë të mbështesin Rusinë” në Këshillin e Sigurimit të Kombeve të Bashkuara (KSKB) kur të dalë një rezolutë që kundërshton operacionin ushtarak rus kundër Ukrainës. India pritet të abstenojë.
