Për herë të dytë brenda pak më shumë se një ore, kryeministri Edi Rama ka sulmuar Lulzim Bashën, për mitingjet me qindra njerëz që mban në qytete të ndryshme të vendit.
Duke iu referuar reagimit të PD-së, Rama thotë se ai nuk ka frikë nga njerëzit, ndërsa shtojnë se qytetarët janë duke u bërë “mish për top për hir të dhëndrit”.
“O lula unë jam i frikësuar për njerëzit tuaj që i bëni mish për top me grumbullimet e turpshme të papërgjegjshmërisë suaj, duke mbledhur njerëz të verbër me makina e me bori, që virusi të bējë dasëm teksa dhëndrri juaj premton ta bëjë ditën natë! Premtim i mbajtur fatkeqësisht!”, shkruan Rama në postimin e tij në Twitter.
“Rama ndihet i frikësuar nga qytetarët e Shqipërisë që duan të sjellin ndryshimin që i nevojitet vendit tonë. Ka vetëm dy mundësi: një lider që punon për ju, për të sjellë ndryshimin që i nevojitet Shqipërisë, për t’i përmirësuar jetët tona, ose Rama i cili dështoi për 8 vite dhe ua dha Shqipërinë oligarkëve.
Më 25 prill, Shqipëria do të fitojë dhe Rama do të humbë!”, deklaronte më herët Partia Demokratike.
Rama ishte i pari që do të reagonte në një postim në Facebook, ku thoshte se socialistët dhe demokratët janë dy botë të ndara, ku në njërën anë vaksinohet masivisht dhe në anën tjetër rrezikohet jeta e qytetarëve përmes mitingjeve që mbahen nga kryedemokrati Basha.
“DY BOTË – Njëra lufton për të shpëtuar jetën e të gjithëve pa dallim, tjetra bën përsheshe me virus për politikë pa din e as iman…
Vazhdon vaksinimi masiv në gjithë Shqipërinë. Vazhdon paralelisht edhe infektimi masiv, për vete hipur mbi makinë, nën këmbë ta hajë kush ta hajë”, shkruante Rama në krye të herës.
(E.K/Faxweb.al)
