Policia e kryeqytetit ka publikuar detaje të reja në lidhje me hetimet që po zhvillon përsa i përket ngjarjes së rëndë të mbrëmjes së djeshme në Tiranë, ku një person i shumë kërkuar i identifikuar si Aldo Iamandi Gjini, pas një sherri për gërvishtjen e makinës, plagosi me armë dy të rinj, të cilët fatmirësisht janë jashtë rrezikut për jetën.
Ndërkohë, në kuadër të këtyre hetimeve, policia ka sekuestruar tre automjete, mes të cilave edhe atë të autorit të dyshuar, ndërsa njofton se vijon puna për kapjen e autorit të kësaj ngjarjeje dhe për dy bashkëpunëtorë të tij, të përfshirë në këtë incident.
Njoftimi i plotë i Policisë:
Tiranë / Bien në prangat e Policisë 3 shtetas, dy prej tyre të shpallur në kërkim kombëtar, për vepra të ndryshme penale.
Në vijim të punës për kapjen e personave në kërkim, shërbimet e Komisariatit të Policisë Kavajë bënë kapjen dhe ndalimin të shtetasit Blerim Toci, banues në Kavajë, pasi Gjykata e Shkallës së Parë Kavajë dhe Gjykatës Apelit Durrës, e ka dënuar me 3 vjet e 4 muaj burg, ku i kanë ngelur për të vuajtur edhe 2 vjet e 8 muaj burg, për veprën penale “Prodhimi dhe shitja e narkotikëve”.
Po nga shërbimet e Policisë Kavajë u bë kapja e shtetasit L. C., 24 vjeç, i shpallur në kërkim nga Komisariati i Policisë Pogradec, si i dyshuar për veprën penale ’’Dhënia ndihmë për kalim të paligjshëm të kufijve”. Iu dorëzua Komisariatit të Policisë Pogradec, për veprime të mëtejshme hetimore.
Specialistët për Hetimin e Krimit në Komisariatin e Policisë Nr.6 bënë arrestimin në flagrancë të shtetasit L. Zh., 42 vjeç, pasi ka ushtruar dhunë fizike dhe psikologjike ndaj bashkëshortes.
Në vijim të ngjarjes së ndodhur mbrëmjen e djeshme ku mbetën të plagosur shtetasit A. Gj dhe J. M., dhe u shpall në kërkim autori i dyshuar i ngjarjes shtetasi A. I(Gj), specialistët për Hetimin e Krimit në Komisariatin e Policisë Nr.1 kanë vijuar me hetime më të thelluara duke shpallur në kërkim dhe dy shtetas të tjerë konkretisht shtetasit Njazi Kulla, 25 vjeç dhe Besard Pashkaj, 22 vjeç, të dyshuar si bashkëpunëtor të autorit të ngjarjes. Në cilësinë e provës materiale janë sekuestruar 3 mjete, njëri prej të cilëve ishte mjeti tip “Audi” në përdorim nga autori i ngjarjes shtetasi A. I(Gj).
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
