Pasi KAS rrëzoi vendimin e Ilirjan Celibashit duke i hapur rrugë regjistrimit të PD në zgjedhjet e 14 Majit, kanë ardhur edhe reagimet e para nga selia blu. Enkelejd Alibeaj ka shkruar se vendimi që mori KAS është konfirmim i detyrimit ligjor për regjistrimin e PD në zgjedhje.
Ai fton edhe njëherë kandidatët e Foltores për t’u bashkuar për zgjedhjet e 14 Majit.
“Vendimi i sotëm i KAS është konfirmim i detyrimit ligjor për të regjistruar PD në zgjedhjet lokale të 14 majit. Vonesa gati dy javore për këtë proces, me autor kryekomisionerin Celibashi është një dëm që u është bërë demokratëve dhe shqiptarëve nga zgjatimet e politikës së vjetër në institucionet e pavarura kushtetuese.Me këtë rast, edhe njëherë ftojmë të gjithë kandidatët demokratë, pa asnjë dallim të bashkohemi dhe të prezantohemi me një kandidat të PD në zgjedhjet lokale. Le të lemë mënjanë mëritë dhe mosmarrveshjet dhe le të bëjmë më të mirën e mundshme përballë regjimit të Edi Ramës.”, shkruan Alibeaj.Ndërkaq, deputeti Gazment Bardhi shprehet: “Qokat politike nuk e kanë të gjatë kur bëhen në kurriz të ligjit. Ilirjan Celibashi është “nongrada” për PD dhe nuk gëzon asnjë besim për administrim të paanshëm, profesional dhe ligjor të zgjedhjeve të 14 Maj. Zvarritja 10 ditore në shkelje të ligjit ka cënuar rëndë zgjedhjet!”/abcnews.al
