Fermerët e shalqinit në Kallm të Fierit, zonë e njohur për kultivimin e kësaj kulture, kanë nisur prej disa ditësh nxjerrjen në treg. Çmimi aktualisht është 30 lekë por kultivuesit i tremben rënies së çmimit teksa apelojnë për një pikë grumbullimi.
Shalqini, një nga kulturat bujqësore që prodhohet më së shumti në zonën e Kallmit në Fier përbën rreth 70% të tokave të mbjella. Shitja e këtij produkti ka nxjerrë në pah mungesën e një pike grumbullimi, e cila do t’u lehtësonte punën fermerëve të zonës. Teksa e vetmja zgjidhje është transporti në pikat ekzistuese të grumbullimit larg Kallmit, fermerët thonë se kostoja është shumë e lartë për ta.
Si pasojë e mungesës së pikave të grumbullimit, fermerët i janë drejtuar tregut të brendshëm për shitjen e shalqinit. Sipas fermerëve, çmimi i shalqinit aktualisht në treg është 30 lekë, por në mungesë të një çmimi tavan ata i tremben faktit të uljes së çmimit siç ka ndodhur vite më parë.
Fermerët pohojnë se për shkak të mungesës së tregut por dhe politikave mbështetëse bujqësore sipërfaqja e mbjellë me këtë kulturë nga viti në vit është reduktuar ndjeshëm.
