Vendosja e një tarife baze prej 10% nga presidenti amerikan Donald Trump për importet, përfshin edhe vendet e Ballkanit Perëndimor.
Shefi i Shtëpisë së Bardhë njoftoi tarifa më të larta për dhjetëra vende që kanë suficit tregtar me Shtetet e Bashkuara, duke shtuar kështu rrezikun e një lufte tregtare dhe rritje të inflacionit. Ndaj mallrave të importuara nga Shqipëria e Kosova sidoqoftë, tarifa e vendosur është vetëm 10%, ndërkohë që për vendet e tjera të rajonit është më e lartë: Serbia 37 për qind, Bosnja e Hercegovina 35 për qind, dhe Maqedonia e Veriut 33 për qind.
Ndërkohë, nga sa pohoi vetë Trump ndaj importeve nga Kina do vendoset tarifë prej 34 për qind, ndaj atyre nga Bashkimi Evropian 20 për qind, Korea e Jugut 25 për qind dhe Japonia 24 për qind. Zyrtarë të lartë të Shtëpisë së Bardhë u thanë gazetarëve se tarifa bazë prej 10% do të hyjë në fuqi më 5 prill, ndërsa tarifat reciproke do të hyjnë në fuqi pas një jave, më 9 prill.
“Taksapaguesit amerikanë janë grabitur për më shumë se 50 vjet. Por, kjo nuk do të ndodhë më”, shprehet Trump.
Implementimi i tarifave në atë që Trump e cilëson një emergjencë ekonomike kombëtare, pritet të prodhojë qindra miliarda dollarë të ardhura vjetore.
Premtimi i tij se vendet e punës në fabrika do të kthehen në Shtetet e Bashkuara si rrjedhojë e këtyre tarifave, por këto politika të tilla rrezikojnë të sjellin një ngadalësim të papritur ekonomik pasi konsumatorët dhe bizneset mund të përballen me rritje të mëdha të çmimeve për automjetet, rrobat dhe mallra të tjera.
