Komisioni i Ankesave dhe Sanksioneve nisi ditën e djeshme rinumërimin e votave për 114 qendrat e votimit të Qarkut të Beratit, vetëm për subjektet zgjedhore dhe jo për kandidatët. Rinumërimi filloi në orën 15:00 dhe u mbyll rreth orës 20:00, dhe do të rinisë sërish sot në orën 09:00.
Nga rinumërimi i 46 kutive të para, diferenca mes Partisë Socialiste dhe LSI është 74 vota, nga 77 që ishin më parë, ccka do të thotë që LSI ka mundur të rikuperojë vetëm 3 vota, të cilat kanë qenë të kontestuara.
Sipas kërkesës ankimore të partive opozitare, në këtë qark ka pasur parregullsi në procesin e numërimit çka sipas tyre ka ndikuar në mosmarrjen e 1 mandati nga LSI.
Ndërkohë, për 2 kërkesat ankimore të Partisë Demokratike dhe Lëvizjes Socialiste për Integrim për pavlefshmërinë e zgjedhjeve në Qarkun e Vlorës, KAS vendosi t’i rrëzojë.
