Avokati i ish-zv. Ministres së Brendshme Rovena Voda ka kërkuar revokimin e masës së sigurisë arrest shtëpie të vendosur këtë të enjte nga GJKKO.
Sipas News24, ai është shprehur hetimi për të ka nisur një vit më parë. Ai i ka mohuar akuzat ndaj Vodës duke u shprehur se nuk mund të japë sqarime për shkak të impaktit që ka pasur arrestimi i saj në opinionin publik.
Mesditën e sotme, GJKKO ka dhënë masën e sigurisë arrest shtëpie për ish-zv.ministren e Brendshme Rovena Voda e cila dyshohet se u ka marrë 2 mijë euro dy grave, me premtimin se do t’i punësonte.
E njëjta masë sigurie është vendosur edhe për dy shtetaset Florida Beu dhe Majlinda Hasani, të cilat dyshohet se i kanë dhënë nga një mijë euro secila ish-zv.ministres.
Rovena Voda hyri në gjykatë nga dera qendrore, por preferoi të dalë nga garazhi i gjykatës, duke shmangur kështu edhe vëmendjen e mediave.
“Ne kërkojmë revokimin e masës së sigurimit në bazë të nenit 248/ të kodit procedurës penale pasi në vlerësimi tonë nuk ekzistojnë kushtet dhe kriteret ligjore të parashikuara nga neni 228, 229 për shkaqe dhe arsyet si vijojnë:
1. Në analize të akteve të fashikullit konstatojmë se procedimi është regjistruar më datë 16.03.2020. Në datat 17, 03, 24.03, 26.07 janë kryer përgjimet në bazë të së cilave prokuroria pretendon faktin penal dhe autorësinë. Pra jemi në kushtet që pas rreth 1 viti e një muaj prokuroria kërkon caktimin e masës së sigurimit.
I nderuar trup gjykues!
Caktimi i masave të sigurimit e ka një qellim dhe funksion dhe ky qëllim është që në kuadër të hetimeve të mos ekzistoje rreziku të shkatërrohen prova, të mos t’i shmanget eventualisht ekzekutimit të vendimit, pra mos largohet dhe të mos kryejë të njëjtën vepër apo vepër tjetër penale. Është e pa dënuar dhe aktualisht nuk ushtron atë funksion apo funksion tjetër publik që do të krijonte qoftë dyshimin se në mënyrë të drejtpërdrejtë apo tërthortë të shkatërronte prova, nuk ka asnjë provë apo dyshim se mund të largohet.
Gjithashtu nga komunikimi me të mbrojturën parashtrimi i rrethanave të faktit është i ndryshëm dhe në një moment të dytë pasi dhe e mbrojtura prej nesh për shkak të impaktit publik që ka krijuar është në pamundësi objektive për të dhënë deklarime, por paraprakisht vlerësojmë të themi që e mbrojtura prej nesh nuk ka kryer asnjë vepër penale”, ka deklaruar në seancë avokati i Vodës.
panorama
