Vendimi i Shteteve të Bashkuara të Amerikës për të miratuar një paketë ndihme ushtarake dhe humanitare me vlerë 40 miliardë dollarë ka ngjallur reagim në të dy kampet e luftës në Ukrainë. Presidenti Volodymyr Zelensky falënderoi Kongresin amerikan që dha dritën e parë jeshile për paketën, e cila duhet të miratohet edhe në Senat para se të dekretohet nga Presidenti Biden.Por ish-presidenti rus, Dimitry Medvedev, akuzoi Shtetet e Bashkuara se me këtë lëvizje i kanë shpallur “luftë përmes një shteti tjetër” Rusisë. Në një mesazh të postuar në kanalin e tij në Telegram, Medvedev tha se SHBA do të vuante më shumë nga kjo paketë dhe do të humbasë edhe ndikimin e saj në botë.“Nuk do të funksionojë. Printimi i parave po rrit ndjeshëm inflacionin dhe borxhin e qeverisë amerikane, dhe do të thyhet shpejt”, tha Medvedev. Që prej dorëheqjes nga posti i kryeministrit në vitin 2020, Medvedev shërben si nënkryetar i Këshillit të Sigurisë Kombëtare në Rusi. Ai është aleat besnik i Presidentit Putin.Në një tjetër postim në Telegram, kryetari i Dumës ruse, Vyacheslav Volodin, akuzoi Uashingtonin se përmes kësaj pakete, SHBA synon të zhysë në borxhe Ukrainën në mënyrë që të përvetësojë rezervat e grurit të vendit.
