Sezoni i gërmimeve arkeologjike në bazilikën paleokristiane të Elbasanit (Scampis) është në përfundim, në kuadër të projektit të Institutit të Arkeologjisë të Tiranës, në koordinim edhe me DRTK Korçë dhe Sektorin e Elbasanit.

Projekti, i drejtuar nga Dr. Elio Hobdari, gjatë këtij sezoni ka pasur në fokus fazat e ndërtimit të monumentit dhe varrimet e kryera në të, përfshirë edhe varre me dhomë nën dyshemetë e kishës.

Rezultatet e këtij sezoni hapin edhe një perspektivë të re në kërkimet në këtë monument.

Puna në bazilikën paleokristiane të Elbasanit, do të vijojë me punime konservuese të planifikuara dhe të ndërmarra nga Drejtoria Rajonale e Trashëgimisë Kulturore Korçë.

Bazilika doli për herë të parë në dritë në vitin 2007 dhe ngjalli interesin e studiuesve dhe vizitorëve të qytetit. Vitet e fundit Bazilika Paleokristiane është kthyer edhe në atraksion turistik.