Oerd Bylykbashi, deputeti i PD-së ka shkruar në faqen e tij të Facebook një status ku ndalet te Komisioni Hetimor, në lidhje me skandalin e McGonigal. Ai përmend deputetin e Partisë Socialiste Taulant Ballën, ku thotë se ky i fundit ka refuzuar ngritjen e këtij komisioni. Sakaq sipas tij firmat e deputetëve janë falsifikuar.
Ndër të tjera Bylykbashi shkruan: “Leproz politik
Në fillim tha Taulanti se komisioni hetimor parlamentar për skandalin McGonigal nuk ngrihet sepse ka firmosur Sali Berisha dhe PS nuk pranon firmën e non gratave. Sharlatanizëm kushtetues.
Më pas Taulanti tha se nuk e ngrenë komisionin sepse firmat e deputetëve kërkues për ngritjen e komisionit hetimor janë falsifikuar. Sipas tij, unë që kam mbikqyrur e udhëhequr hartimin e kërkesës, nuk paskam firmosur. Në Washington informova interlokutorët e interesuar për hetimin që po bën Kongresi amerikan që kemi nënshkruar e do të dorëzojmë kërkesën për komision hetimor. Budallëk me brirë i Taulantit nga halli.
Sot në parlament thanë që nuk ngrihet komisioni sepse kanë në plan që në të ardhmen të ndryshojnë ligjin e komisioneve hetimore. Pra me rregull treshi, paskan pezulluar zbatimin e ligjit sepse me kismet do ta ndryshojnë. E me këtë rast mohojnë të drejtën kushtetuese të 35 deputetëve të ngrenë të papenguar komisionin. Idiotësi kushtetuese nga sikleti.
Sonte Rama pohoi me gojën e tij thelbin e të vërtetës. Deklaroi se ai nuk do ta lejojë në asnjë rast ngritjen e atij komisioni. Ankthi e shtyn në marrëzi brutale antikushtetuese.
McGonigal do t’i dalë nga hundët. Me siklet.
Dhe homologët e tij do të kenë siklet t’i japin dorën, si kryeministrit që korruptoi një zyrtar të lartë me qëllim që të përdorte FBI në luftën e tij për të shkatërruar opozitën.”
