Thirrjes së KQZ- së, për përllogaritjen e kostos të paisjeve të identifikimit biometrik, për zgjedhësit në zgjedhjet e 25 prillit , i janë përgjigjur deri me tani 6 kompani.
Shifra më e lartë e përllogaritur është 28 milionë dollarë dhe është ofruar nga një kompani e huaj, ndërsa shifra më e ulët është 14 milionë dollarë nga një kompani shqiptare.
4 kompanitë e tjera janë të huaja dhe kanë përllogaritur përkatësisht, 24 mln euro, 20 mln dollarë, dhe dy të fundit nga 15 mln euro. Afati i kompanive për t’u përgjigjur është deri në 19 nëntor, më pas KQZ do përllogarisë mesataren e vlerave të paraqitura dhe më pas shumën do ia dërgojë qeverisë për të vazhduar më pas dhe procesin e tenderimit.
Identifikimi biometrik i zgjedhësve është një nga çështjet e dakordësuara në marrëveshjen e 5 qershorit në Këshillin Politik, me opozitën jashtëparlamentare.
Identifikimi biometrik synohet të realizohet në të gjitha qendrat e votimit ndërsa KQZ i ka hapur rrugën dhe votimit dhe numërimit elektronik që sipas marrëveshjes do të realizohet në jo më shumë se 20% të zonave zgjedhore.
