Policia greke ka sekuestruar 23 kg heroinë dhe ka vënë në pranga 2 persona një prej tyre shqiptar. Mediat greke bëjnë me dije se droga vinte nga Turqia. Në prangat e policisë kanë rënë një shtetas turk, 50 vjeç dhe një shqiptar, 43 vjeç, të cilët dyshohet se janë anëtarë të bande ndërkombëtare të trafikut të heroinës.
Operacioni për arrestimin e tyre është kryer në autostradën Selanik-Athinë. 50-vjeçari ka transportuar me kamion ngarkesën ilegale, të cilën e ka importuar përmes Doganave të Kopshteve, në Evros.
Ndërkohë bëhet me dije se në parkun e makinave, afër daljes në Veria, turku është takuar me shqiptarin, i cili ka marrë dy çanta shpine që përmbanin gjithsej 23 pako heroinë, me peshë totale 23 kg dhe 126 gram.
Lëvizjet e tyre janë monitoruar nga policia, e cila ka ndërhyrë, duke ndaluar makinën e drejtuar nga shqiptari, të ngarkuar me drogë, ndërsa në të njëjtën kohë është arrestuar edhe i bashkëpunëtori i tij 50-vjeçar.
Sipas llogaritjeve, pas papastërtive heroina do të katërfishohej, duke kapur një vlerë prej 90 milionë eurosh, nëse shitej në treg.
