Edmond Duzha 42 vjec dhe Bekdash Cukalla 39 vjec, të dyshuar për vjedhjen e rreth 173 milionë lekëve në 11 dhjetor 2021 në Supermarket “Halo” në Sarandë tashmë ndodhen të lirë.
Me dy vendime të Gjykatës së Apelit Gjirokastër dhe asaj të Sarandës, dy të dyshuarit janë lënë të lirë pa “zhurmë” më shumë se dy muaj më parë.
Fillimisht në 29 shtator ata lanë qelitë duke i’u caktuar masa “Arrest në shtëpi” ndërsa në 20 nëntor Gjykata e Apelit Gjirokastër ka liruar përfundimisht Cukallën dhe më pas në 6 dhjetor Gjykata e Sarandës liroi edhe Duzhën. Ndaj te dyve jane caktuar masat e sigurisë “detyrim për t’u paraqitur në policinë gjyqësore” dhe “ndalim i daljes jashtë shtetit”.
Nuk dihet se si Gjykata e Apelit e ka argumentuar lirimin e Cukallës, por Gjyqtari Fatmir Ndreu i Sarandës duke u mbështetur edhe në kërkesën e Prokurorit Ilir Hoxha argumentoi mes të tjerash lirimin e Edmond Duzhës se “Gjykata, duke vlerësuar objektivisht rrethanat e çështjes objekt hetimi, me qëllim që të ruhet edhe barazia në trajtimin e shtetasve nën hetim, çmon të zëvendësojë masën aktuale me atë të “Detyrimit për t’u paraqitur në policinë gjyqësore” duke shtuar edhe masën “Ndalimi i daljes jashtë shtetit”.
