Është zbardhur shpërthimi me tritol që ndodhi mëngjesin e kësaj të enjte në qytetin e Shkodrës. Lënda plasëse ishte vendosur në pjesën e jashtme të garazhit, në pronësi të shtetasit Agim Uraj, 52-vjeç. Shtetasi në fjalë është pronar i një kompleksi në Shkodër.
Policia ka bërë të mundur identifikimin e dy personave që kanë vendosur tritolin, dhe ka bërë shpalljen e tyre në kërkim.
Bëhet fjalë për shtetasit: Seadet Muftia dhe Zabit Mehmedaj, të shpallur në kërkim edhe më parë, për ngjarje të tjera kriminale.
Nga veprimet hetimore dyshohet se 2 autorët janë larguar nga vendi i ngjarjes, me një motomjet të vjedhur në qytetin e Shkodrës, pak para ngjarjes.
Të dy këta persona kanë luajtur me ekipin e futbollit të Vllaznisë.
Njoftimi i policisë:
Zbardhet ngjarja e ndodhur në orët e para të mëngjesit të datës 29 qershor 2023, në lagjen “10 Korriku”, ku shtetas të paidentifikuar vendosën lëndë eksplozive në garazhin e automjeteve të një shtetasi.
Falë veprimeve të shpejta dhe profesionale hetimore, u bë i mundur identifikimi i 2 shtetasve të dyshuar si autorë të vendosjes së lëndës eksplozive, si dhe u bë shpallja e tyre në kërkim.
Autorët e dyshuar, të shpallur në kërkim edhe më parë, për ngjarje të tjera kriminale.
Vijon puna intensive për kapjen e 2 shtetasve, të cilët janë larguar me një motomjet të vjedhur pak para ngjarjes, në qytetin e Shkodrës.
Strukturat hetimore te Komisariatit të Policisë Shkodër, në bashkëpunim me ato të DVP Shkodër dhe me Prokurorinë e Shkodrës, menjëherë pas ngjarjes së ndodhur në lagjen “10 Korriku”, Shkodër, ku në derën e garazhit të automjeteve, në pronësi të shtetasit A. U., shpërtheu një sasi lënde plasëse (me pasoja vetëm dëme materiale), kanë organizuar punën me qëllim zbardhjen e kësaj ngjarjeje, si dhe për identifikimin dhe kapjen e autorëve.
Falë veprimeve të shpejta dhe profesionale hetimore, administrimit të provave në vendngjarje, si dhe këqyrjes së kamerave në aksin rrugor përmes të cilit dyshohet se mund të ishin larguar autorët, u bë e mundur zbardhja e ngjarjes, si dhe identifikimi i 2 autorëve të dyshuar të saj.
Gjithashtu, nga këto veprime dyshohet se 2 autorët e dyshuar janë larguar nga vendi i ngjarjes, me një motomjet të vjedhur në qytetin e Shkodrës, pak para ngjarjes.
Në vijim të veprimeve procedurale për këtë rast, u shpallën në kërkim shtetasit S. M, 27 vjeç dhe Z. M., 27 vjeç, të shpallur në kërkim edhe më parë, për ngjarje të tjera kriminale të ndodhura në qytetin e Shkodrës.
Vijon puna intensive për kapjen e tyre.
