Yaccine Bounou është lojtari më i ri i Al-Hilal.
Klubi saudit ka njoftuar me anë të një videoje në rrjetet sociale zyrtarizimin e portierit maroken, i cili vjen nga Sevilla. Për shërbimet e 32-vjeçarit, arabët paguan 21 mln euro në arkat e kluybit andaluzian.
“Gardiani” ka firmosur deri në vitin 2026 me Al-Hilal, kontratë nga e cila do të përfitojë 12 mln euro neto në sezon. Bono është vendosur menjëherë nën urdhrat e trajnerit portugez Jorge Jesus.
Vijon kështu trendi i transferimit të lojtarëve nga Europa drejt Ligës Arabe, me këta të fundit që e kanë marrë seriozisht investimin në sportin më popullor në botë. Kjo është blerja e gjashtë e Al-Hilal në kontinentin e vjetër pas Neymar, Ruben Neves, Milikovic-Savic, Koulibaly dhe Malcom.
Bono luajti ndeshjen e fundit me Sevillan në finalen e Superkupës së Europës, duel të cilit spanjollët e humbën pasa goditjeve të penalltive. Portieri i lindur në Kanada, ishte një nga më të mirët në Botërorin e Katarit, teksa ndihmoi Kombëtaren e tij të arrinte deri në fazën gjysmëfinale të kompeticionit.
Marokeni, të cilin e kërkonte edhe Bayern Munchen, luante me Sevillan që nga 4 shtatori i vitit 2020. Kur u transferua nga Girona për 4 mln euro. Me Sevillan ka zhvilluar 142 ndeshje dhe e ka mbajtur portën e paprekur në 58 raste! /Supersport
