Stuhia e fuqishme që ka goditur vendin tonë ka shkaktuar dëme të mëdha në portin e Durrësit, duke këputur litaret që lidhin tragetet dhe duke krijuar kaos në zonën e anijeve.
Pasagjerët që po udhëtojnë drejt Barit me tragetin e linjës “Franceska” thonë se për shkak të dallgëve të forta trageti ka pësuar një lëvizje të papritur, duke u spostuar rreth 100 metra nga vendi i tij, pas prishjes së litareve.
Kjo ka shkaktuar një rrezik për varkat e vogla dhe për hekurat që kanë rënë mbi anijet e tjera.
Situata paraqitet kaotike në Port dhe shumë pasagjerë janë detyruar të qëndrojnë të bllokuar në makinat e tyre deri në normalizimin e situatës.
Fatmirësisht, nuk ka raporte për të lënduar, por situata mbetet shqetësuese pasi trageti “Franceska” që kryen udhëtimin për në Bari, për momentin është pezulluar deri në stabilizimin e kushteve të motit dhe sigurisë.
