Dy persona janë arrestuar në Elbasan për përfshirje në fushën e narkotikëve.Sipas asaj që raporton policia e Elbasanit, njëri prej tyre shpërndante lëndë narkotike kokainë dhe kanabis, ndërsa tjetri ra në pranga për moskallëzim krimi.
Policia raporton se u sekuestruan kokainë, kanabis, automjeti që dyshohet se përdorej për të mundësuar aktivitetin e paligjshëm, aparate celularë, një shkop metalik dhe një shumë parash.
Elbasan/Vijojnë operacionet për goditjen e veprimtarive kriminale në fushën e shpërndarjes së narkotikëve.
Finalizohet me sukses operacioni i koduar “Bulevardi”.
Arrestohet në flagrancë një shtetas që shpërndante lëndë narkotike kokainë dhe kanabis, si dhe një tjetër për moskallëzim krimi.Njëri prej tyre me precedent penal në fushën e narkotikëve.
Sekuestrohen kokainë, kanabis, automjeti që dyshohet se përdorej për të mundësuar aktivitetin e paligjshëm, aparate celularë, një shkop metalik dhe një shumë parash.
Specialistët për Hetimin e Narkotikëve në DVP Elbasan, në bashkëpunim me shërbimet e Forcës së Posaçme “Shqiponja”, bazuar në informacionet e siguruara për një rast të shpërndarjes së lëndëve narkotike, nën drejtimin e Prokurorisë Elbasan, organizuan dhe finalizuan operacionin policor të koduar “Bulevardi”.
Gjatë operacionit u kapën dhe u arrestuan në flagrancë shtetasit:
-F. P., 37 vjeç, banues në Elbasan, i dyshuar për veprat penale “Prodhimi dhe shitja e narkotikëve” dhe “Prodhimi, mbajtja, blerja apo shitja pa leje e armëve të ftohta”;
-L. Xh., 34 vjeç, banues në Elbasan, i dyshuar për veprën penale “Moskallëzimi i krimit”. 34-vjeçari me precedent penal në fushën e narkotikëve.
Këta shtetas u kapën në flagrancë në bulevardin “Qemal Stafa”, duke udhëtuar me automjetin tip “Mercedes Benz”, me drejtues shtetasin F. P. dhe pasagjer shtetasin L. Xh.
Gjatë kontrollit në automjet, shërbimet e Policisë gjetën dhe sekuestruan një shkop metalik me hapje, lëndë narkotike të dyshuar kokainë dhe kanabis, të ndara në doza gati për shitje.
Gjithashtu u sekuestruan automjeti, 3 aparate celularë dhe një shumë parash në euro dhe lekë, të dyshuara të përfituara nga shitja e lëndëve narkotike.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme hetimore.
