Eksperti rrugor Islam Qibini, ka qenë i ftuar në emisionin ‘Me Xhaxhiun’, për të folur mbi aksidentet rrugore që ndodhin çdo ditë në vendin tonë, e që kulmuan të premten në aksin Fier Vlorë, ku u shua familja Gushi.
Sa i takon atij aksidenti, Qibini tha se të gjitha të dhënat paraprake tregojnë se ka ndodhur për shkak të shpejtësisë me të cilën udhëtonte mjeti Audi A8, që drejtohej nga Igli Madani, dhe tha se shoferi në rastin në fjalë nuk ka ditur që të menaxhojë situatën, për shkak të mungesës së eksperiencës në drejtimin e mjetit.
Sipas Qibinit, në rast se mjeti kalon shpejtësinë e qarkullimit 90 kilometra në orë, automatikisht rriten shanset për aksidente, pasi drejtuesi mund të humbasë shumë shpejt kontrollin e makinës.
“Kemi një bilanc negativ, ka pasur pasoja të rënda për jetën e qytetarëve, shihet qartë se shumë të rinj nuk zbatojnë rregullat e qarkullimit rrugor.
Duhet të ketë një edukim të vazhdueshëm për rregullat e qarkullimit rrugor, duke nisur nga parashkollori, është një detyrë që duhet ta bëjë ministria e arsimit dhe kulturës, duhet të ketë programe të posaçme për edukimin e të rinjve. Qytetarët duhet të kenë parimet bazë të njohjes së rregullave të qarkullimit rrugor, këto programe derimë tani nuk janë bërë.
Dihet që shpejtësia vret, dëmi shëndetësor rritet, është e pashmangshme, drejtuesi i mjetit ka një kohë të vogël në dispozicion për të reaguar.
Mbi 90 kilometra në orë ti del jashtë kontrollit, në rrugët brenda qyteteve mjeti mund të dalë jashtë kontrollit dhe me shpejtësi deri në 50 kilometra në orë.
Policia Rrugore duhet të reagojë pikërisht ndaj këtyre personave që bëjnë parakalime të gabuara dhe me shpejtësi të lartë.
Janë njerëz që nuk kanë formimin e duhur, nuk e njeh rrezikun dhe bën vaki që ky mjetin e ka marrë pa u munduar, prindërit kanë përgjegjësitë e tyre pasi mjetin nuk mund tiua japin në një moshë të caktuar, kur nuk janë të përgjegjshëm.
Nuk mund të vendosim policë në çdo segment rrugor, pjesa më e madhe ka të bëjë me edukimin.
Rasti i Vlorës ishte i paprecedentë, ai segment rrugor është deri 110 km/orë, problemi është vetëm shpejtësia tej metrave të lejuara, ka qenë rreth 170-175 metra në orë, nga një drejtues mjeti që nuk është i aftë për të vepruar në këto raste, pasi fushëpamjen e ka pasur përpara. Ka qenë paaftësia e tij profesionale ajo që e ka shkaktuar aksidentin.
Shkak kryesor atje është shpejtësia, edhe pse duhet që të presim ekspertizën përfundimtare”, u shpreh Qibini.
fax
