Dy helikopterë të forcave serbe po patrullojnë vazhdimisht në afërsi të kufirit Kosovë – Serbi, duke vëzhguar situatën. Meqë ishin relativisht larg nuk dallohej nëse ishin helikopterë të forcave policore apo ushtarake serbe.
Më herët, edhe në kodrat në afërsi janë parë forca serbe duke vëzhguar.
Patrullime të herëpashershme në territor të Kosovës po kryen edhe KFOR-i me helikopter. Në pikat kufitare me Serbinë, janë vendosur forcat e Njësisë Speciale të Kosovës, që po mbikëqyrin situatën.
Që nga e hëna, kur Qeveria e Kosovës vendosi masë reciprociteti për targat e veturave të Serbisë, serbët lokal në veri të Kosovës kanë bllokuar dy rrugët që çojnë në pikat kufitare në Jarinjë dhe Bërnjak.
Rruga për në pikën kufitare të Jarinjës vazhdon të jetë e mbyllur edhe në ditën e katërt të protestës së serbëve lokalë.
Aty po protestohet pas masës së reciprocitetit për targat e veturave nga Serbia, të vendosur nga Qeveria e Kosovës, raporton KOHA.
Sipas policëve të Njësisë Speciale të Kosovës, dy vetura të xhandarmërisë së Serbisë janë vërejtur duke patrulluar në distancë të afërt ajrore me Policinë e Kosovës, por në anën e territorit serb.
