Policia e Tepelenës ka vënë në pranga tre persona të cilëve pas kontrolleve të bëra në makinën me të cilën lëviznin u janë gjetur sasi të lëndëve narkotike “kanabis”.
Gjithashtu janë sekuestruar 18.520 euro të cilat janë gjetur në banesën e shtetasve, Fatjon Dule 30 vjeç, Perikli Naçi, 23 vjeç dhe Vaso Mërçi, 44 vjeç, të tre banues në Sarandë.
Njoftimi i Plotë:
Tepelenë
Finalizohet me sukses operacioni policor i koduar “Transporter 3”.
Me drogë dhe një shumë të madhe eurosh në automjet, arrestohen në flagrancë drejtuesi dhe 2 pasagjerët, të cilët dyshohet se shpërndanin lëndë narkotike.
Sekuestrohen 18 520 euro, një sasi me lëndë të dyshuar narkotike cannabis sativa, 1 armë e ftohtë (thikë), 8 aparate celulare dhe automjeti.
Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, specialistët e Seksionit për Hetimin e Trafiqeve të Paligjshme, në bashkëpunim me Komisariatin e Policisë Tepelenë, në bazë të informacioneve të siguruara në rrugë policore, organizuan dhe finalizuan me sukses operacionin policor të koduar “Transporter 3”, në kuadër të të cilit u arrestuan në flagrancë shtetasit:
Fatjon Dule 30 vjeç, Perikli Naçi, 23 vjeç dhe Vaso Mërçi, 44 vjeç, të tre banues në Sarandë.
Në hyrje të qytetit të Tepelenës, shërbimet e Policisë kanë ndaluar automjetin me drejtues shtetasin V. M. dhe pasagjerë shtetasit F. D. dhe P.N., në të cilin, gjatë kontrollit, u gjetën një sasi lënde e dyshuar narkotike cannabis sativa, një armë e ftohtë (thikë), 8390 euro dhe 8 aparate celulare.
Gjatë kontrollit fizik të ushtruar ndaj shtetasit P. N., u gjet një sasi tjetër lënde e dyshuar narkotike cannabis sativa, ndërsa gjatë kontrollit fizik të ushtruar ndaj shtetasit F. D., u gjetën 2140 euro.
Gjithashtu, nga kontrolli i ushtruar në banesën e shtetasit V. M. u gjetën 7990 euro.
Në cilësinë e provës materiale u sekuestruan në total 18 520 euro, arma e ftohtë, lënda narkotike, 8 aparate celulare dhe automjeti.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
